娛樂

2017年12月14日

2017/02/17 (週五) 12:00上午

未到終點 劉心悠

《渣打香港馬拉松2017》剛完結,卻見不到劉心悠的蹤影,有傳是因為今年的運動品牌贊助,與她代言的運動品牌有衝突,劉心悠惟有棄跑,不過事後她解釋因為要拍劇而未有時間準備 。不過劉心悠喎……幾乎已是香港娛樂圈的馬拉松Icon,大大小小的賽事、練習,加起來已是不知幾多個10公里了!想當日誤打誤撞,在不知「馬拉松」為何物的情況下陪朋友報名參賽,誰知多練幾次便愛上了。這,就是劉心悠跑步故事的起點。

撰文:鄧穎琪|攝影:Allen|服裝:adidas|髮型:Eric Chow @ Xenter|化妝:Circle @ Annie G. Chan Make-up Centre

對運動員來說,一旦開始跑步,整個生活規律可能都不一樣了,但心悠從來都不會逼迫自己,大原則就得一個,「唔好同健康背道而馳囉,有啲人唔瞓覺去跑馬拉松,但因為太早起跑,對心臟都係一種負擔。」

不跟規矩
作為全職藝人,心悠不可能有一個固定的跑步時間表,所以她的心態亦很隨意,只要跑之前做妥熱身就好,「我真係想跑,鍾意跑,點都要Keep住我好鍾意跑步嗰個Freshness囉,唔好每樣嘢都好似工作咁,我驚有日我會唔鍾意跑步,唔使特定去設計喺邊度跑、幾時跑,總之想做就做。」
香港天氣焗,室內、外溫差又大,若穿得不夠通風便很容易病,所以她認為跑步服裝很重要,「夏天就一定唔着褸,太熱喇,冬天跑馬拉松其實仲難啲,因為等到開跑時間個溫度已經唔同咗,會感冒。我覺得跑步啲人可以隨時袋一件好薄身嘅外套喺身,落雨都有得擋吓。」話雖如此,但心悠直言很多時落雨都仍然會去跑,不怕跣嗎?「會呀,最多跑慢啲囉,濕到睇唔到嘢就梗係唔得啦!不過我又幾Enjoy嗰個濕嘅感覺。」

聽自己的聲音
跑過10年里程碑,看上去弱質纖纖的心悠變得愈來愈不在乎別人想法,「跑馬拉松嗰日有好多人話要快過隔籬嗰個,其實唔需要同人比,自己開心、自己覺得贏、覺得快,咪得囉!我第10次跑10K嗰時真係覺得跑幾多都冇所謂,跑步令我愈來愈Focus自己嘅聲音,多過在乎人哋點睇。」的確有不少人因為心悠而對跑步萌生興趣,她憶述起媽媽搭巴士的趣聞,「佢話有兩個媽媽,A同B講:『你知唔知呀,我個女跑馬拉松快過劉心悠呀!』哈哈,都係好事,馬拉松同劉心悠好似好有關係咁。」
不過心悠卻沒想過再進一步,轉行做跑步教練,「教人同自己跑唔同㗎,有一年紀嘉文幫我做Training,佢好認真執我嘅姿勢,我自己真係鍾意跑步嘅,如果成日畀人捉錯誤,其實會唔開心。我驚會Discourage到啲鍾意跑步嘅人,所以都係以身作則鼓勵大家算啦!」心悠的跑步路途或會再有更多個10年,終點?還遠得很呢!