娛樂

2018年12月20日

2018/05/11 (週五) 12:00上午

有咁大 玩咁大 林敏驄 梁漢文

為了4年一度的世界盃,Viu TV特意重金禮聘,是波友的林敏驄和梁漢文主持遊戲節目,兩人相識多年,相信應該有一定的默契,不過當口沒遮攔的林敏驄,遇上出名好好先生的梁漢文時,又會產生甚麼的化學作用呢?早前,兩人為節目接受本報專訪,在訪問過程中已感到他們相當有火花,如談到Viu TV首次在黃金時段播出自家製的大型遊戲節目,而非外購的韓劇,林敏驄即打趣道:「所以當梁漢文係韓仔啦!」梁漢文亦不甘示弱說:「當林敏驄係韓星啦!」到底是為製造效果出來的火藥味,還是真拗撬?真係要睇過節目先知喇!

採訪:黎寶倫、林凱妍
撰文:林凱妍
攝影:ChaseK
服裝:Puma(林敏驄)、Adidas(梁漢文)
髮型:Moe at Fifth(梁漢文)
化妝:Hetty Kwong(梁漢文)
場地:Sky Fitness HK

Viu TV的新節目《Good Night Show全民星戰》是香港市民與明星對戰的遊戲節目,每期節目嘉賓會玩遊戲,挑戰成功將獲得獎金,但挑戰失敗的話,獎金就會送給香港市民,梁漢文(Edmond)指這是一個很新鮮的遊戲節目,「我哋永遠都企喺觀眾立場度諗嘅,因為以前嘅遊戲節目真係睇個嘉賓就嚟贏,會好戥佢緊張,但今次唔係,你係希望嘉賓輸,嘉賓輸你就可以攞佢啲錢,真真正正真金白銀,家庭觀眾可以攞到錢,咁所以今次對於觀眾嚟講個睇法係唔同嘅。」

講一套做一套
這次Viu TV可說是相當大手筆,整個節目將合共送出超過100萬獎金,不只觀眾睇得興奮,林敏驄(阿驄)也深深感到嘉賓們與別不同的積極參與感,「以往我哋以嘉賓身份上遊戲節目,都係無乜所謂玩玩吓,過癮為主,但唔知點解今次啲嘉賓好狼死,個個都想『擸』晒啲錢,所以我哋睇唔過眼就改一改規則,主持可以無定向亂入去騷擾嘉賓,直情係刁難佢哋,令佢哋冇咁易贏到。」Edmond補充說:「務求喺佢哋身上面攞到最多嘅錢畀家庭觀眾。」
乍聽之下,兩個人都講得好大義,要為全港觀眾爭取最多的獎金,但一見到靚女嘉賓上場,莫講話觀眾,連老婆都拋諸腦後,阿驄笑言:「唏,我哋睇情況㗎嘛,所以話無定向亂入就係咁解啦。」Edmond就直指:「靚女唔只着數,佢(阿驄)自己自願去扎埋一齊㖭啦,啲遊戲明明要綁住啲女嘉賓嘅,佢就自己走埋去扎埋一齊,所以我都扎埋一份囉!」難道不怕太太會鬧?Edmond坦言:「失去咗理智啦!」而阿驄也乘機取笑Edmond說:「忘晒形啦佢,即係同佢飲咗酒一樣,會畀差人拉㗎啦。」又將Edmond早前醉駕一事擺上枱!

玩得就唔計較
眾所周知,阿驄最鍾意整蠱人,就連同為主持的Edmond也難逃一劫,但加害人的阿驄依然很正經地說:「嗰陣時佢黑仔吖嘛!其實我做呢個Show都係為咗佢,驚佢萬一咩,真係要人照顧吓佢。依家邊有咁易恰到佢啊!開籠雀咁!依家不知幾巴閉啊!」一旁的Edmond也只能無奈苦笑道:「真係多謝你!」
不過Edmond也沒有為此生氣過,「點會嬲㗎做節目,最緊要佢唔好嬲我得啦,管唔到佢咁多㗎啦。」阿驄聞言還得寸進尺說:「嬲都冇計,得個嬲字咋嘛,嬲咪又係棧自己辛苦,識咗咁耐大家都知大家嘅底線啦,有啲嘢係講笑咁講咗佢。」
向來說話無底線的阿驄,不時都會講些諧音有色笑話,即使是電視台的黃金時段也阻擋不了他,「我都唔理佢幾點播,講得就講,我哋講嘅嘢全部都解得通,你哋自己諗多咗啫。」由此看來,Edmond的角色就變得相當重要了,畢竟他是唯一能控制暴走阿驄的人,「我梗係要平衡番佢啦!佢成日唔知講講吓又唔知行咗去邊度,我諗一個好睇嘅Show或者好睇嘅戲,都唔係兩個一樣嘅人做嘅,都係要有一個去平衡番先會出到個效果嘅。」

惡頂的懲罰
有位如此不受控制的主持,想必節目的嘉賓也會被玩得很慘,而講到被激得最嬲的嘉賓,阿驄即說:「梗係羅家英啦!佢話『喂,阿驄哥!又話有奶粉錢嘅?』大佬啊,我奉旨幫你嘅咩?我幫理不幫親㗎嘛!」而Edmond就指:「家英哥攞得嗰幾千銀走,佢話之前黃日華佢哋嚟到,每個都拎咗兩皮幾,今次唔可以少過佢哋,點知佢嚟拎得幾千蚊,陰公!但佢嚟咗兩集嘅,再上嚟玩多次,就攞番多啲走啦。」
不只兩位主持人玩得癲,節目組準備的懲罰也相當有水準,阿驄稱甚至媲美讓人聞風喪膽的《美女廚房》,「有一Pat嘢仲臭過《美女廚房》啲嘉賓煮嘅嘢食,叫瑞典臭魚,臭過啲芝士、坑渠蓋 。」惡頂到連曾經作為《美女廚房》主持人之一的Edmond也頂唔住,「呢個瑞典臭魚真係Number 1,開頭唔覺得有咩問題,覺得OK,有幾臭啊?哇!跟住慢慢開始嚟料,全廠人都頂唔順走晒,臭到要疏散,返番入去都唔掂,佢哋噴咗好多香水,到第二日返廠都仲聞到嗰陣味,你諗下有幾臭!」