娛樂

2017年10月20日

2017/02/17 (週五) 12:00上午

最完美平衡 譚耀文

要成為一個成功的藝人,總要有十八般舞藝,唱歌、演戲樣樣識,工作才會接踵而來。但要在自己興趣和工作之間取得平衡,總要經過一番掙扎,好像歌唱比賽出身的譚耀文,於內地過完幾年瘋狂拍劇的日子,近年又回歸香港拍電影,能再次用廣東話演戲的同時,又可以多抽時間過過親子樂。最近更重拾唱歌的樂趣,不但演出音樂劇,更再次有新歌派台,但阿譚卻無意急於重拾歌手身份,「依家想做咩都得,可能拍緊戲嘅時候唱吓歌,唱歌嘅時候拍番戲又得,我比較鍾意自己無束縛。」隨心情樣樣試,可能才是生活中最完美的平衡。

撰文:Crystal| 攝影:Eddy| 服裝:Dorian Ho Homme
化妝:Alfred@seven Sense| 髮型:Lobo@Chin.G| 場地:九如坊蘭桂坊

新秀歌唱大賽冠軍出身,但原來阿譚已經20多年冇推出歌曲,因為於4月舉行的《風雲5D音樂劇》,不但讓他一路唱一路演,過足歌癮,「以前跟住梅姐(梅艷芳)做世界巡唱,同許志安、草蜢啊都會有幾隻歌講吓故事咁,諗起都好好玩,但係同今次嘅性質唔同,絕對見得人,一啲都唔失禮㗎!」音樂劇中他飾演武林高手「無名」,雖然名氣不如兩位主角「聶風」和「步驚雲」大,但自言為《風雲》Fans的他,就形容角色是一個絕對經典,「佢係一個世外高人,熟悉《風雲》嘅Fans一定會知,想當年我睇漫畫嘅時候都未入行。而且主要係武林高手我都想做,因為之前好多電影都搵我做反派,好歇斯底里,但係今次做咁正直嘅英雄,天下第一劍喎!可以畀觀眾新鮮嘅印象,睇吓譚耀文點樣去做一個正氣嘅人物。」
爆肌做主角
音樂劇標榜5D技術,4D就聽得多,但第5個D究竟是甚麼,阿譚卻大賣關子,「都係特技上嘅嘢啦,Disney都係得4D電影,我哋5D多咗嘅就係勁啲啲,哈哈!」風雲的角色造型每每登場,都能引起話題,阿譚更大爆原著馬榮成與美術總監奚仲文曾為今次音樂劇的角色造型「激烈溝通」,「大家都知奚仲文一向好認真,又好想創新,而馬榮成又好想保持佢筆下嘅形象,所以雙方都需要『協調』吓,良性溝通咁啦,所以依家都未有人知道會變成點樣㗎。不過爆肌、露肉呢啲就等『風雲』兩個主角做啦,佢哋偶像派嚟嘛,『無名』就一定要着衫嘅!」為了今次音樂劇,他更再次推出單曲《慾望面前》,拍MV、上電台派歌,過去的回憶再次湧現,「成20年冇上過電台派歌,見番啲DJ好似有啲時光倒流嘅感覺,好開心。」
走過最難捱
過去不少時間都留在內地拍劇、拍電影,今次音樂劇的演出,讓他推掉不少內地的工作,可以說是將重心完全搬回香港,「其實早兩、三年都多咗喺香港拍戲,雖然都有喺內地拍,但就少咗拍內地嘅電視劇,主要係想拍多啲好嘅香港電影。」他形容最難捱的時期已經過去,現在可以多花時間陪陪小朋友,「最難捱係11年嗰時我個女出世,啱啱有套我做太監嘅劇好收得,之後就一套接一套,嗰一年拍咗百幾集,返唔到嚟,我淨係返嚟剪咗臍帶,抱咗一抱,留兩日就返上去橫店。嗰時成日諗:『唔拍啦!』想返嚟睇個女。但係藝人好得意,嗰幾年Hit咗一部戲就唔會停, 當時真係好大掙扎,好Miss個女,但又好Miss現場開工。好大矛盾,終於拍咗好多嘢,覺得攰,好多樂與苦都嘗透晒,呢個範疇都要停一停,應該Take個Break,再返嚟睇吓發展新嘅嘢 。」

有意返無綫
捱過最忙碌的幾年,阿譚選擇回流香港專注電影,不但時間更容易分配,待遇都相對較好,「香港人好得意嘅,努力啲喺出面拚搏,返嚟嘅待遇先會好啲,如果淨係喺香港,好似做極都差唔多。」他又指原來無綫一直都有向他招手,希望他能回巢拍劇,「可惜之前幾次都撞咗期,之後有啱嘅可能都會拍,都希望畀多啲支持自己嘅觀眾一個回饋啦!」做過太監、臥底,甚至將會出演的世外高人,但阿譚更笑言近年亦有一個重要角色,「依家做緊柴可夫司機囉!多咗啲時間可以送仔女返學、游水,不過個仔都10歲啦,就嚟識飛啦,唔使陪㗎啦。」雖然話仔大仔世界,但每次提起10歲的囝囝和5歲的囡囡,阿譚總流露出充滿父愛的笑容,「以前成日嗌佢哋睇我嘅作品,但佢哋死都唔肯睇。反而依家會成日問我:『你部戲點點點喎!』直頭會記得晒我嘅角色!」有一對寶貝仔女做自己的最強後盾,難怪阿譚可以無束縛,做咩都得!