娛樂

2018年12月15日

2018/12/07 (週五) 12:00上午

星情飯局 30之後…

小品劇集能叫好叫座,甚至勝大製作,箇中主因是故事夠貼地、大家容易看得投入。像剛播完的《跳躍生命線》,劇中的「救護四子」:羅天宇、何廣沛、郭子豪及張彥博非常入屋,他們化身的「跳躍F4」演繹《無畏的肩膀》MV,更是抵死過癮!
今天,和「救護四子」之一的羅天宇坐在J’s Bar,由惡搞F4經典歌《流星雨》說起,按不住已笑到一個點……

撰文:Carrie Yip (carrieyip@msn.com) 攝影:Rico

清晰往後目標
和羅天宇沒有好好的坐下來聊天,原來已有3年,大家「驚訝」時光的快逝,但也不及他在「救護四子」的造型。
「跳躍F4喺網上嘅點擊率咁多、又有迴響,真係有啲意料之外。嗰時諗住宣傳下套劇,估唔到大家會鍾意,我哋好開心!不過拍嗰時,忍笑真係好頂,好在喺拍《愛・回家》嗰時,有啲笑位都係即場夾出嚟,對捉搞笑嘅節奏、有啲幫助嘅,但如果真係正正式式拍套喜劇,都要再鍛煉先得!」《跳躍生命線》有口碑,羅天宇開心,也確真想做劇中人!
從觀眾視角:羅天宇所飾演的譚Sir,又Fit又Man了,外形確似一位救護主任。「做譚Sir呢個角色,有認真去操Fit,日日雞胸加西蘭花,媽咪會盡量唔影響卡路里之下,加啲胡椒、檸檬汁,食落冇咁寡。到真係口痕時,我會食啲杏仁!同埋呢,我跟咗依家一個幾流行嘅飲食方法減肥,首先唔食嘢16至20小時,然後嗰4至6個鐘,就盡量食啲蛋白質落肚,喺唔食嘢嗰段期間,身體就會迫啲脂肪化為能量嚟用,我覺得幾有效!仲有會做一大堆帶氧運動囉,依家去Gym變成咗習慣,Keep住一個禮拜都郁5至6日。點解我咁想成為譚Sir?喺我30歲生日,出現咗呢個角色,係上天一個安排。30歲前嘅我,對自己冇乜要求、冇乜人生目標,畀人嘅感覺懶懶閒閒、冇團火,係一個好宅嘅人;但因為譚Sir,完全投入咗去,男人做嘢係要認真、係要有要求……冇呃你,我清晰咗往後嘅目標,以後要試多啲、做多啲唔同嘅嘢!」

好好照顧阿媽
有多少人記得羅天宇是在2008年參加「香港先生」、於少年組摘冠而加入娛樂圈?反而,我相信除了現在的「譚Sir」,較多人對羅天宇深刻印象的是「馬子仁」。
「調番轉頭講,《愛·回家》去尾段,我啲戲份重咗啲,但馬子仁唔係好似真實嘅自己。《愛・回家》播完之後嘅嗰段時間,好迷失,會問自己係咪唔識演戲?就算之後嘅《馬家開飯》或者《馬家過聖誕》,又唔係純主持、又唔係演戲,終於等到譚Sir呢個角色出現,我走去上堂,睇教演戲嘅書,我畀咗150%嘅功夫去做好佢,心諗:呢鋪唔得就玩完,搞到嗰排好大壓力,瞓都瞓唔好!依家鬆咗一口氣,希望有其他監製睇到我喺《跳躍生命線》嘅演出,對我有信心,會搵我去做其他嘅角色。」羅天宇繼續說:「我覺得依家嘅我,開始咗另外一個階段,對屋企要更加有承擔,因為我遲咗起步,工作方面要更加嚴格,追番以前嘥咗嘅時間!未來喺劇集方面,我希望藉住自己一啲嘅角色或者自己嘅能力,畀多啲正能量、有關生命嘅信息出嚟,盡自己嘅一啲能力去改變呢個世界,令到個世界可以更加美好,我相信好多演員都想咁做。近番自己啲,就好希望唔使再交租,有自己嘅地方,唔使家人煩惱生活,畀阿媽享受下,好好照顧佢。」
男人三十而立,果真如是。

J’s Bar
地址:尖沙咀麽地道69號帝苑酒店2樓
電話:2733 2088
平均消費:約$250/位
泊車:帝苑酒店代客泊車
營業時間:12:00-01:00(星期一至五)、15:00-01:00(星期六、日及公眾假期)

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。