娛樂

2017年6月23日

2017/04/21 (週五) 12:00上午

星情飯局 鐵漢柔情 張兆輝

輕喜劇《全職沒女》正在播,有很多演員都做得出色,身為男主角的張兆輝(輝哥)更不在話下。
認識輝哥兩年了,他太太跟我說:「佢喺朋友圈唔係咁多朋友㗎咋!」可以成為輝哥的其中一個朋友,實在榮幸。這幾年間,輝哥常常北漂拍劇,偶然回港一會又回去工作,今次實行捉緊輝哥回國內拍戲的前一天,晚飯暢聚。

撰文:Carrie Yip (carrieyip@msn.com)
攝影:David Lee@chinapixel
美術:Ronnie Cheung

做三個月茄喱啡
「接拍《全職沒女》,最主要係我覺得個故事幾新鮮、有趣,同埋監製喺我初拍劇時已識,大家識於微時;我亦相信輕鬆嘅劇集,觀眾會比較鍾意。」非常念舊又有情義,82年輝哥由TVB訓練班出身,輝哥說:「我哋嗰個時代比較好彩,入行時有訓練班讀,武術、跳舞所有嘢都要學,仲要出嚟做三個月茄喱啡,係個好好嘅Training,依家睇返,我嫌嗰時學嘅嘢唔夠多㖭。依家電視圈好似少咗啲人去接力,唔係淨係講後生嗰批,唔同年期嘅演員都好似少咗。我哋嗰時演出,隔籬左右都係好戲嘅前輩,好容易帶到我哋入戲,真係會令我哋好易吸收。」
變化萬千的演藝圈,輝哥看透,亦為現今新人說話:「我遇過啲新演員都好勤力㗎,咁佢哋一出嚟就要拍戲,冇咁多時間畀佢哋學習,係要啲時間嘅。」輝哥繼續說:「喺《全職沒女》最尾嗰場,我拍完即刻就要上大陸,一班年輕嘅演員張振朗、陳瀅收咗工都唔捨得走,大家等埋一齊開香檳慶祝⋯⋯做任何嘢都要講團隊精神,見到佢哋咁合拍,係一件好事。」

重視家庭的男人
輝哥十分包融後輩,也沒有恃着自己是前輩擺款。最近他在國內擔正的網劇《北上廣不相信眼淚》和《雞毛飛上天》成績很好,其中更有43億瀏覽。「我成日話做演員,冇得話鍾唔鍾意個角色㗎,只係能唔能夠遇到一個好嘅角色發揮。如果未遇到,咪努力做好眼前囉。」簡單幾句演員心聲,講容易但要做得完美,個人內外都要點功夫。
「北漂拍戲,一套劇有講國語、英語、韓語、廣東話嘅演員,會同好多人一齊合作……我諗冇乜邊個香港演員會話唔攰嘅!我每次都好掛住屋企,專心拍完之後,一定會抽時間同太太阿仔阿女放假,一齊去學潛水、滑雪,多啲家庭活動,增加大家嘅感情。」
重視家庭,輝哥自小根深蒂固。「我爸爸係一個家教好嚴嘅人,着重傳統禮儀,佢覺得一個和睦嘅家庭,係最好嘅鼓勵,而坐埋一齊食飯,就係我同仔女最好嘅溝通時間。」愛家的輝哥還告訴我一件事:「啱啱結婚時,拍攝旅遊特輯去哈爾濱,一去成20幾日,夜晚又凍又掛住屋企,咪好情深咁寫信寄番嚟,點知返到嚟,太太都未收到嗰封信。」輝哥說着,身旁的輝嫂會心微笑,鐵漢柔情,最浪漫!

外灘拾號
地址:荔枝角長裕街10號地下
電話:2336 6776
平均消費:約$350/位
泊車:億京廣場一期停車場
營業時間:11:30-22:00

星情飯局
主持 Carrie葉嘉儀
傳媒人。喜歡「吃」,皆因非只飽足五臟,更可透看人情。