娛樂

2019年6月27日

2016/10/21 (週五) 12:00上午

星情飯局 貓仔變老虎 伍允龍

憑着電視劇《城寨英雄》的「貓仔(龍成虎)」一角,伍允龍(Philip)人氣急升,演技、外貌、身手統統獲好評,瞬間成為不少女人心目中的男神!

Philip不只有型,熟絡後還好玩得,我們在Eight Grand飯局,趁餐廳冇乜人,Philip和攝影師談得投契,Philip一手拿着香檳、另一手拿着醬料,大顯飛身踢的動作場面,路過人紛紛停下來欣賞,今次真是一個充滿動作又搞笑的「星情飯局」,值回票價!

撰文:Carrie Yip (carrieyip@msn.com)|攝影:David Lee@chinapixel|美術:Ronnie Cheung

踏入武師世界

網上維基百科說,Philip由2001年踏足娛樂圈,第一部參加的電影是《野獸之瞳》。「呵呵,嗰部唔算係我第一部戲,係朋友叫、半玩心態。嚴格來講第一部嘅戲係2003年嘅《少年阿虎》,係我真正入行嘅電影。嗰陣時係由好友鄭敬基介紹我畀錢嘉樂識。嘉樂需要一個識得詠春洪拳同泰拳嘅武指,跟住仲要去訓練當時嘅兩位演員就係安志杰同埋吳建豪,佢哋兩個都係『英文人』,咁就啱我,亦好多謝嘉樂畀咗呢個機會我,踏入武師世界,而安志杰同埋吳建豪亦成為好兄弟。仲記得嗰陣時我哋三條友坐喺屯門海水化淡廠,拎住個飯盒望住個海,大家喺度傾偈,喺度諗十年後我哋會做啲咩呢?」Philip說着,閃亮的雙眼更精靈,一切猶如昨天。

「估唔到我哋十幾年後,可以一齊做一套大家都鍾意嘅戲《潛龍追擊》,拍番80年代我哋鍾意睇嘅武打片,所以都幾感動同埋幾開心。因為大家都好了解對方,我哋打出嚟或者拍出嚟嘅嘢,都會有一種估唔到嘅化學作用,而《潛龍追擊》應該年尾就可以上映,今次我會做監製加動作導演同埋兩位好兄弟一直合作演出,非常好期待。」目前《潛龍追擊》已經做後期製作,年底即將上映,Philip的粉絲一定不容錯過!

名利得來不易

Philip入行已十多年,之前娛樂版有關他的新聞,都說他是某人男友、奀星……諸如此類的報道,把他的汗水、努力冰封起來!

「睇到嗰啲新聞,我真係有唔開心,明明有付出咗努力,但啲人都睇唔到咁!晶哥(王晶)同我講:『佢哋話你奀星,咁你畀心機,一於做一個大星畀佢哋睇!』」「王晶」不負有心人,Philip終於有今日的成績,但完全沒有半點僥倖。

「未入行之前我曾經諗過做漫畫家。大學畢業後亦教過書,教書時,班學生就好似係觀眾咁;幫啲學生策劃課堂,從中有好多人與人相處嘅技巧,到今日係幫到我嘅。我主修藝術,可以幫我去諗拍戲畫面;自小識得功夫,令我識點樣用功夫去表達身體語言,打嘅每一下、同埋唔識打係有分別嘅。」Philip七歲開始學習武術,1990年在美國教授詠春,練得一身好武藝,但亦有受傷時。

「拍《潛龍追擊》,斷咗條肋骨、裂咗一條肋骨,再踢多一腳就插入肺,好危險。跟住眼角要縫針,膝頭爆咗,又腸胃炎,呢套戲都拍得幾辛苦。做演員,可以喺拍完戲之後返去休息,但我做埋幕後製作,拍完戲仲要去傾製作上嘅嘢,基本上係冇得休息!」Philip繼續說:「一套電影對於我來講係一件藝術品!觀眾唔會知道我拍戲嗰陣有幾辛苦或者有受到傷,觀眾只會睇晒整套戲去批評好唔好睇。所以我唔想自己作品出咗嚟會有遺憾,希望畀大家睇嘅係最完美演出,電影係永遠嘅,我條肋骨、眼角縫針都會有好番一日,咁更搏盡力去做得好眼前嘅嘢。」

Philip的「貓仔變老虎」,我相信很快上映!

Eight Grand

地址:    銅鑼灣軒尼詩道500號

    希慎廣場12樓1203號舖 

電話:3568 8621

平均消費:約$250 /位

泊車:希慎廣場停車場

營業時間:11:30- 23:00

星情飯局

主持 Carrie葉嘉儀

傳媒人。喜歡「吃」,皆因非只飽足五臟,更可透看人情。

 

;