娛樂

2018年10月22日

2018/08/10 (週五) 12:00上午

星情飯局 認真的魅力 黃智賢

最近,男演員黃智賢(Ben)多了一個朵:「黃老闆」。「我一路都有諗、想做一啲小生意,但係又唔想貿貿然咁做,結果我由客人成為La Puro嘅其中一個股東。」黃智賢認真的說。
不少巴士車身、一些網上平台等等,都見黃老闆帥氣十足的廣告照片,果然認真又落力!

撰文:Carrie Yip (carrieyip@msn.com)
攝影:Ronald

要有良心
黃智賢榮升老闆,開幕酒會當天,歐陽震華、關詠荷、 陳松伶、譚玉瑛、陳慧珊等群星聚賀,星光熠熠。
所謂「唔熟唔做」,對醫美這門專科生意,黃智賢坦言用了3年時間的親身體驗來觀察,「自己啲皮膚唔算太好,當年兩位醫生拍檔幫我做Laser,睇住慢慢有改善,佢哋技術好,所講嘅嘢都有醫學知識同數據,同埋現今啲美容儀器Support,對佢哋好有信心。自己係用顧客角度去睇呢行,唔好焗人去買咩療程,做得要有良心!」黃智賢笑笑的補充:「我有睇埋佢哋嘅人品㗎,如果唔係,點會由佢哋嘅客,大家可以變成拍檔呢?佢哋唔係生意人,唔會諗點樣去搞醫美賺多啲錢,成日話最緊要客人滿意效果、變靚啲、皮膚好咗,就滿足。我自己都有用心㗎,今時今日好多人仲對醫美好懷疑,所以我咪經常去公司睇下運作成點,同多啲客人傾下偈,多了解 下每個療程嘅細節、客人嘅用後感同效果,仲有啲機嘅功能,譬如打斑吖,唔同嘅斑用邊款儀器去處理,我都會去了解。今次唔係一般嘅商品代言,想做好自己間公司,有時喺公司見佢哋忙,我乜都會幫,接電話嗰個係我都唔奇㗎!」
Team Work精神
今年過了大半,黃智賢說日子都是過得非常充實的,除了首次做老闆,拍劇方面,已播出的有《波士早晨》、《翻身武林》口碑亦不俗。
「今年我真係冇好好咁停過落嚟,所以好希望拍埋手頭上嘅嘢,可以喺下半年平衡番少少就好啦。忙完公司開幕,好在依家拍緊嘅《鐵探》啲開工時間唔係好密,叫做比較舒服一啲。但到10月,另一套30集劇亦要開嘞。」其實,拍好仍未出街的還有《是咁的·法官閣下》、《好日子》、《危城first lady》,那麼黃智賢最期待哪一套播出呢?「如果真係要揀會係《是咁的•法官閣下》,呢套劇好香港貼地社會嘅問題,講好多香港人嘅生活同感情關係,但係啲Case都密嘅!我個角色亦有新鮮感,佢有一啲小幽默,工作以外係小男人,劇中同關禮傑有好多一啲師兄弟鬥氣嘅情節,我覺得幾有趣。」吃了一口千層酥,黃智賢繼續說:「拍劇,對於我嚟講係有一定滿足感。但今日嘅我,已經唔會再分係咩崗位,我覺得每一個位置都有佢嘅功勞同戲劇作用。如果係做主角嘅,就要做番做主角嘅責任,每一個角色都要努力先至可以構成一套劇嘅成功,唔係單純一個人嘅功勞。」不只一套劇,任何事情和工作當中,都是沒有誰最重要、沒有誰最不重要,是“Team Work”精神。

La Table
地址:尖沙咀東部麼地道72號
千禧新世界香港酒店1樓
電話:2313 4222
平均消費:約 $380/位
泊車:酒店代客泊車
營業時間:12:00-15:00、
18:30-22:30(星期日及公眾假期休息)

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。