娛樂

2018年5月22日

2018/05/18 (週五) 12:00上午

星情飯局 感心動耳 胡琳

被封為「爵士小天后」的胡琳(Bianca)於下周便開Show了,密鑼緊鼓的排練也要鬆一鬆。於是,我們便揀了環境漂亮的六公館吃吃飯、聊聊天,幾爽!
「同啲朋友嚟過呢度、食過幾次飯,好舒服。其實如果天氣好,仲可以坐出平台,對住維港景飲嘢,唔錯㗎!」這天下雨又天暗,但是和胡琳坐在餐廳一角傾偈,已很Relax了。

撰文:Carrie Yip (carrieyip@msn.com)
攝影:David

突破以前
女人有一副好嗓子,也是一種魅力。好像胡琳,她說話時溫婉,燕語鶯聲,十分悅耳,令人很放鬆,所以每隔兩3年,她所舉辦的演唱會必定有忠實粉絲捧場。
「其實,演唱會對於我嚟講係每隔一陣同粉絲、歌迷嘅聚會,希望藉此一齊分享音樂、表演同埋自己一啲嘅蛻變,更加原汁原味咁喺舞台上呈現。」 今次闊別演唱會舞台三年,胡琳於Star Hall舉行兩場的「Shining Moment 演唱會2018」,事先的凖備功夫十足,之前還親身飛去紐約綵排。「今次嘅綵排,一路做一路都Feel到有進步,同我嘅團隊合作得愈來愈成熟,喺過程之中,我覺得自己都有突破,而呢種突破,係希望以聲線同音樂去突破之前嘅一啲框框,但呢個所謂嘅框框,只係人哋畀我、覺得我係點點點,而唔係我自己一直Set畀自己嘅。呢次演唱會裏面,好希望會做到一個最成熟嘅表演,令在場嘅每一位亦會感受到當中嘅成果。」被譽為天生靚聲,胡琳絕不會辜負歌迷所望,她說:「我出道之後至到依家,都有一啲嘅封號讚我把聲好聽,喺開頭我真係唔知點樣面對,同埋又覺得呢啲封號係一啲框框,會框住咗我嘅發展,不過後來再去諗,都係大家欣賞我同我嘅製作團隊,喜歡我嘅歌聲同演出,實在要Appreciate同感謝每一位支持我嘅人先至啱。」

成就今天
對於音樂,胡琳一直都很努力和認真。之前推出不久的新專輯《Moment》,也是用了很長時間去製作,看過她在冰島拍的MV《自遊》,人靚景靚聲靚,是水準之作。
「我覺得做音樂一定要用心,同埋每一首歌或者每一個作品自己都真係要鍾意嘅,因為如果自己都唔鍾意,你點樣令到其他人聽完之後有感受到同享受呢?我相信每一首歌係有靈魂、係有真誠喺裏面嘅話,啲歌迷係會聽得出嚟嘅。」很認同胡琳的說話,只要認真做,定有知音人。很多人都知道胡琳曾經在紐約四年,深造音樂,在此期間,亦令她接觸到很多流行音樂以外的東西,例如爵士樂、音樂劇等,成就了今天她所走的音樂路。
「我第一個接觸嘅流行歌手係鄧麗君,嗰陣時我媽媽好鍾意聽鄧麗君嘅歌曲,基本上所有鄧麗君嘅歌我都識唱。嗰個年代仲係錄音帶,我好拽咁將啲錄音帶一條條咁樣掹咗出嚟,令到我媽媽好嬲。媽媽同我講喺我BB嘅時候,我一聽到音樂就會好乖、唔喊,嗰陣時爸爸媽媽仲好鍾意聽我唱歌,又會將我唱啲歌錄低,所以我應該係喺細細個時已經鍾意咗唱歌呢樣嘢。」三歲定八十,我信。

六公館
地址:尖沙咀海港城
海運大廈地下
OTE101號舖
電話:2577 1668
平均消費:約$600/位
泊車:海港城海運大廈停車場
營業時間:11:30-14:30、14:30-15:30、18:00-22:30(可坐至2:00)

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。