娛樂

2018年12月20日

2016/12/02 (週五) 12:00上午

星情飯局 愈行愈強 黃德斌 謝東閔 梁彥宗

對比上一代的人,我們經歷的所謂辛酸,有時頗微不足道;追求的幸福,以為很遠,其實早已在眼前,只是不懂珍惜。

遠赴尼泊爾喜瑪拉雅山拍攝《天與地》的三個主持人黃德斌、謝東閔及梁彥宗,成功登上馬納斯盧峰。這三個男人在浩瀚天地裏度過廿日,體會到人類的渺小。

生與死可在分秒之間,愈行卻把他們變得愈強。今天黃德斌、謝東閔及梁彥宗在Bistro Seoul喝着韓式燒酒慶祝:又征服了一關!

撰文:Carrie Yip (carrieyip@msn.com)|攝影:David Lee@chinapixel|美術:Ronnie Cheung

蟻步行每步

《天與地》下星期首播,黃德斌、謝東閔及梁彥宗三人的宣傳片久不久就看到,他們三個代表「天」登上馬納斯盧峰;代表「地」是麥美恩、陳婉衡及朱智賢,則去了廣西的天坑……對於我來說,「天」的雪景高峰,比較吸引。

「依家回想起嚟,整個過程都幾有趣嘅,睇到人性啦、自然景色嘅變化、團體嘅合作精神。其實講真,我上山時已經想放棄,成團人之中差唔多我係最大年紀嘅嗰個,不過好在有個導演細過我,都要慢慢咁行,同我一齊有個伴囉,哈哈!」黃德斌話成功登上馬納斯盧峰是「超額完成」。他說:「拍呢個登山特輯,我哋每日行成8至10小時,又唔可以日日沖涼,同埋每個人都有或多或少嘅高山反應,都幾辛苦!嗰時其實可以再行高啲,但專家話我哋裝備不足,無謂勉強再上,命仔要緊。」一直做旅遊節目主持的梁彥宗補充:「我雖然拍開旅遊特輯,肉體上係承受到嘅,但實情又高、四周係雪地,好似蟻步咁行每一步,我仲要寫埋稿,我哋三個人加埋兩個導演要做埋揸燈揸機……其實我哋係一支好迷你嘅拍攝隊伍,好考大家嘅合作精神。德斌好似爸爸,好穩陣;而東閔係個隨遇而安、好真嘅人。今次對於我係一個非常難忘嘅旅程。」

年少有多好

對比黃德斌、梁彥宗,我覺得謝東閔「青靚白淨」,要挑戰高峰,或會較辛苦吧!

謝東閔很坦白:「要適應高山反應其實都幾吃力,我試過最犀利食五粒頭痛餅,只係輕輕一個轉身都會氣喘,營內同營外溫差好大,走出營外去廁所個路程都要慢慢行,要行成廿分鐘,其實會令到成個人都幾迷惘、意志消沉!」

但是艱巨旅程,謝東閔自言亦有得着的,尤其是人生感悟:「我哋行經好多好偏遠好落後嘅一啲村莊,見到當地村民嘅生活好簡單,先知道自己眼前嘅幸福原來已經好好多。我哋喺山上邊一個好靜好大嘅環境,真係聽到一啲大自然嘅聲音,譬如雪崩、狼叫,起初聽到呢啲聲都會好驚,但後來都適應咗啦。」

「喺呢個Trip裏面,我見到年輕人嘅力量,幾羨慕,『年少多好』呢句話冇錯,行到咁高嘅山,真係步步驚心!上到頂,基於高山反應,大叫都唔得,人好脆弱、渺小到不得了!其實,攀山呢種活動,真係會令人謙卑咗嘅。」被謝東閔及梁彥宗稱為「隊長」的黃德斌語重心長地說。

Bistro Seoul

地址:灣仔皇后大道東200號

利東街地下G22-23號舖

電話:3752 2882

平均消費:約$300/位

泊車:利東街停車場

營業時間:11:00-23:00

星情飯局

主持 Carrie葉嘉儀

傳媒人。喜歡「吃」,皆因非只飽足五臟,更可透看人情。