娛樂

2018年11月18日

2018/11/09 (週五) 12:00上午

星情飯局 小店情味 陳婉衡

拍旅遊節目好玩?其實,坐在熒光幕前看,會比較過癮。陳婉(Alycia)現在是旅遊節目《3天2夜》主持之一,上天下海爬泥跳傘等等等,她說有些時候,並非那麼好受。我好記得《天與地》真人Show當中,陳婉在天坑喊到花容失色也要撐下去的一幕⋯⋯

撰文:Carrie Yip (carrieyip@msn.com)攝影:David

愛屋企飯
談起出埠拍旅遊節目,陳婉就滔滔不絕,「我覺得主持旅遊節目可以話難,亦都係一個挑戰。我本身好鍾意運動,同埋都幾鍾意去睇去感受到唔同嘅世界。不過要長期Keep住自己好Fit嘅狀態,預備人哋叫你去邊度都可以隨時跟大隊出發。呢幾年裏面,最難忘係拍《天與地》,要落到好深嘅天坑,嗰次真係要有好好嘅體力,都幾危險嘅。人愈大,就知道一啲嘢嘅危險性,我畏高,但工作關係,好多時候要我去到好高拍攝嘢,係頂硬上㗎咋。」自言畏高,但陳婉衡卻告訴我目前最想挑戰的地方是喜馬拉雅山,因為好型。
「私底下,我唔係咁女仔,唔使工作嗰陣時,我着運動衫居多,好少好少好少化妝。我超鍾意做運動,都考咗一個健身教練牌,做健身係一個你付出有幾多就會收番幾多嘅嘢,完全係靠自己努力換番嚟、冇得出賣!」陳婉愛行山、運動,在飲食方面,也是非常懂得健康之道的女生。「出街吃飯會揀小店,好似呢度咁,有外國Feel。放假時,會去買餸,一次過整定8個飯盒,畀自己帶去開工同埋帶出街食。我食白肉為主,最鍾意係雞胸肉,會用藜麥去代替白飯。我好鍾意煮嘢食,拿手煮一啲家常小菜,譬如豉椒炒涼瓜、蒸水蛋。我好鍾意『屋企飯』嘅味道,到今時今日最掛住、最再回味嘅一餐飯,係細細個同屋企人坐埋一齊食四餸一湯嘅時候。」
想做打女
在剛完了的TVB節目巡禮中,陳婉一襲Deep V長裙,吸睛指數爆燈,「騎劫」了不知有多少對眼睛?但熟悉陳婉的朋友告訴我,她是一個很爽朗、沒架子,不是像她外表般嫵媚,只不過上天給她一副惹火身材而已。
「其實,我唔太介意性感,但初初嗰時真係好唔慣,香港同外國對性感嘅接受程度好唔一樣,喺外國性感唔係一件唔好嘅事。好似喺外國,個個都比較大隻,有啲肉哋;喺香港,普遍都追求瘦。我喺溫哥華嗰陣時,曾經130至140磅,冇人會覺得有乜問題。不過返到嚟香港工作,個個女仔都好瘦咁嘅,咪逼自己要去改變,要做運動、做瑜伽,慢慢鍛煉身體。其實我細時上體育堂係包尾嗰個、零運動,但依家我超鍾意行山,夏天都會行,畀啲朋友覺得我傻,話太過熱,佢哋受唔住。」陳婉繼續說:「我想將自己嘅運動心得,點樣去整嘢食拍成片,開一個自己嘅YouTube頻道,分享畀大家,點樣做適當嘅運動、點樣食得健康,同埋運動可以緩解壓力嘅。」除了開個人的頻道,陳婉亦希望有更多拍劇機會,最近她拍了《救妻同學會》,飾演一個黑幫、啞女角色,「接到呢個角色,直情開心到死,因為唔可以講嘢又表現一啲感情,再加埋有少少嘅動作場面,對我係一個新嘅嘗試,依家亦開始對拍劇有興趣,我唔係一個太識搞笑搞氣氛嘅人,而拍劇可以完全去投入去做另外一個人,係另外一個感覺嚟嘅,好希望有機會做打女,同我性格非常脗合,反而你要我喺人哋面前做一啲好女人嘅角色,好嗲聲嗲氣,我仲覺得唔係咁自在!」一個性感的女殺手,相信不少網民亦期待。

Bistro Du Vin
地址:西環堅尼地城爹核士街1號地下D號舖
電話:2824 3010
平均消費:約$350/位
泊車:爹核士街咪錶位
營業時間:12:00-14:00、18:00-22:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。