娛樂

2019年1月18日

2019/01/11 (週五) 12:00上午

星情飯局 女神是鐵人 簡淑兒

最近簡淑兒(Jessica) 在個人Instagram上放了一張大Show腹肌的照片,獲得不少圈中朋友和粉絲讚賞。
「一直都覺得一個女仔有腹肌都係一件幾有型嘅事,結果大概半年前同教練講咗,於是就開始操練,好開心趕得切喺2018尾可以完成呢個心願!」簡淑兒滿意地說。

撰文:Carrie Yip (carrieyip@msn.com) 攝影:Rico

戒唔甩雪糕
健身成功,可放膽食。今次多得好友安排,不用排隊便可到「重慶劉一手火鍋店」暢快的吃個夠!
「練腹肌,除咗幾型,都係想畀自己多一個嘅目標,練下自己意志,每星期上三堂,要戒宵夜,但係開工嗰時好難頂;食零食,要少糖少味精,如果真係肚餓,就會食少少米通。不過有啲嘢一定戒唔甩,係雪糕呀,就算去到好凍嘅地方,我都要吃朱古力雪糕㗎!」嬌滴滴的簡淑兒獨立而堅強,記得她曾到東京參加「斯巴達障礙賽」,賽事中要潛入泥漿、爬石牆等廿多個障礙,過程邋遢難睇,簡淑兒也不怕,膽量和體力十足!
「可能喺屋企排中間,讀書時已經自己搬出嚟住,由細到大好多時候都自己照顧自己。我唔鍾意女仔畀人睇小,可能係咁,我嘅興趣都比較男仔,鍾意揸車、學賽車、學騎馬、學電單車⋯⋯我仲想做女俠做打女,細細個已經好鍾意睇武打片,有機會畀我試下就好囉!」所以憑外形去估計簡淑兒,絕對是錯的,「仙氣女神」表裏不太一樣,女神實在是鐵人!

值得撐落去
吃着火鍋,嘗到美味的,簡淑兒會很滿足的笑瞇瞇,一雙腰果眼,甜美又充滿電力。「以前有個男朋友投訴我太過獨立,哈!希望未來嘅男朋友簡單,又接受到我嘅工作。同藝人拍拖,喺一啲場合裏邊拖唔到手,可能會畀狗仔隊跟蹤,真係要好唔介意先得,未必個個男仔接受到㗎!不過喺呢個時候,我唔會為愛情而放棄依家工作嘅。」簡淑兒的決心,除了是對演藝工作的熱愛,也來自「粉絲力量」,「好多粉絲由我出道時支持到依家,佢哋一直好錫我。試過其中一個小粉絲,聽到我喺電台訪問,即刻趕嚟電台,咁啱喺電台門口見到,佢氣鑼氣喘但面上好開心,只係希望可以親口同我打氣。呢啲唔係咩禮物,但已經好窩心、好感動!佢哋嘅支持,令我覺得點樣辛苦都值得撐落去!」
回望2018年,簡淑兒參演的四套劇:《平安谷之詭谷傳說》、《波士早晨》、《大帥哥》及《救妻同學會》,表現都很好。「最近兩套劇都好鍾意。《大帥哥》嘅裘娸娸,好似十八、 九歲嘅自己,簡單開心;Dicky(張衞健)好人又肯教人,會照顧成個團隊。喺《救妻同學會》做江湖大嫂,販賣毒品,着魚網絲襪嘅Wet妹造型,實在唔太慣,不過係一個新挑戰。2018都幾滿意嘅,仲有出咗首《謝謝你傷過我》呢;但係2017嘅願望,有啲未達成,好似我一直都想拍電影,依家仲等緊!鞏俐係我偶像,佢有氣質,拍好多類型嘅片都得,我以佢為目標㗎。2019有好多嘢都係未知之數,呢行好被動,唔係單憑自己想點就掂,我會堅持留喺呢一行,希望可以做多啲唔同類型嘅工作,再努力去做好啲、好啲!」簡淑兒深明白現今「女神」多的是,令工作範疇更大更闊才是致勝之道!

重慶劉一手火鍋店
地址:銅鑼灣渣甸街66號地下及1樓
電話:2110 8889
平均消費:約$500/位
泊車:怡和街68號地庫停車場
營業時間:12:00-24:00(星期五、六,營業至01:30)

主持

Carrie葉嘉儀
傳媒人。喜歡「吃」,皆因非只飽足五臟,更可透看人情。