娛樂

2018年9月24日

2018/07/13 (週五) 12:00上午

星情飯局 劉佩玥 微笑之道

每一個人,都有個人生存之道,這些伎倆從何而來?大扺是家人教導、朋友感染、生活環境影響等等,你呢?
2013年「香港小姐」季軍的劉佩玥(Moon),挾着持港姐名銜入行,到目前已是TVB彈出的女演員之一,工作量不斷上升。
在標籤為大染缸的演藝圈工作5年了,不長但也不短,劉佩玥依然可以保持滿滿正能量,這全憑她的「微笑之道」!

撰文:Carrie Yip (carrieyip@msn.com)
攝影:Rico
髮型及化妝:Matt Lau @mattlau_makeup

我都會有負能量
和劉佩玥在Wooloomooloo Prime飯局,落地玻璃窗外是開揚的海景,再配上劉佩玥的爽朗笑聲,令悶熱夏天透心涼。
劉佩玥是一個甜姐兒,絕對無人會異議,充滿正能量的她趁在今年書展裏,推出個人的第一本書《我的微笑之道》,目的是將個人的正能量分享給大家。
「大半年前,我開始喺自己Ig嗰度Post《我的微笑之道》呢個Project嘅Hastag。呢個Project源於我中學嗰陣,我有讀文學,好想喺30歲之前可以出到一本書,喺今次書展可以完成呢個心願,真係好開心!」劉佩玥透露今次自資出書投資咗六位數字,由構思到籌備至排版等,她都參與其中,「因為呢本新書,自己安排咗一個美國旅程,得我、化妝師同攝影師3個人,乜都一手一腳包辦,旅程裏邊有好多好難忘嘅嘢,有好多預計唔到嘅複雜事,譬如我哋想去一個峽谷,但要有準許證先可以入到去,咁要臨時轉地方梗失望,但去到嗰處遇到日落估唔到咁靚,嗰一刻眼泛淚光、好感動⋯⋯人生就係一個精采旅程,包括咗有目標、有夢想,當中當然會有一啲意料之外嘅事,但呢啲嘢係可以幫助到自己嘅成長㗎!」態度決定命運,劉佩玥自言:「唔好以為我一直都冇挫折,亦都冇負能量,只不過係當遇到問題時,你點樣去面對,而我就會揀笑住咁樣去面對一切。」
以生命感染生命
生於文人之家,家教甚嚴,劉佩玥憶述:「我媽咪係一個好嚴嘅人。細個時,我跌低咗,坐咗喺個地下度,自己覺得好好笑,笑完我就會爬番起身,可能係咁,媽咪唔會特別呵我、就我,仲覺得對我呢個女可以更加嚴厲,哈哈!而我喺呢個家,覺得自己天生有一個Mission,係要令到屋企人開心、帶歡樂畀佢哋。」
她笑言自己是家中的「13點」,劉佩玥一直很愛家人,而她的文學修養,全靠是寡言的爺爺。「除咗媽咪,我諗爺爺係影響我好多嘅人,爺爺唔多說話,對於呢個13點嘅孫女,佢都接受嘅,但佢要求我文武雙全,佢話:『你自己有能力,先可以行得更遠、同埋先可展現出嚟!』因為爺爺,細細個我讀好多古典文學,論語、紅樓夢等,點解我咁用心?係我有責任去了解爺爺嘅世界,融入上一代人嘅思想,其實老一輩嘅人曾經站過喺佢哋嗰個時代最前端,In過㗎,只不過同我哋唔同時代啫,佢哋值得尊敬㗎。」
說着說着,劉佩玥語重心長起來:「神,做每一個人,對於呢個世界都係有意義嘅。我希望出咗《我的微笑之道》之後,可以有機會去學校同一啲學生做分享,我都係香港成長,搭過熱狗(舊式沒空調的巴士)返學⋯⋯依家好多年輕人都好Focus係科技上,不如拎番起本書、睇番啲文字吖,會有另一番領悟!今次出書就算唔賣得我都會繼續,希望可以感染到一啲年輕人。」以生命感染生命,劉佩玥的出書意圖極有意思,值得支持!

Wooloomooloo Prime
地址:尖沙咀彌敦道100號
The ONE 21樓
電話:2870 0087
平均消費:約$500/位
泊車:The ONE停車場
營業時間:11:45-00:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。