娛樂

2018年9月25日

2018/09/14 (週五) 12:00上午

星情飯局 健康的閨蜜 連詩雅 梁諾姸

好友是怎樣做成?離不開是:有接近的經歷、有相同的興趣、有相似的社交圈⋯⋯
連詩雅(Shiga)和梁諾妍(Inez)同是Model出身,大家同一間公司,兩人因為喜歡跑步而更投契,是一對美麗而健康的閨蜜!

撰文:Carrie Yip (carrieyip@msn.com)|攝影:Ronald

清淡飲食成習慣
我們的飯局,揀了南洋酒店內的和幸,由日本大廚主理地道菜式和小吃,氣氛好,環境舒適。面對枱上不同的美食,連詩雅說:「我媽咪係日本人嘅緣故,其實我都幾鍾意食日本嘢,好多時同朋友都會食日本菜,今次個粟米我最鍾意,夠晒健康!」
「我就鍾意個關東煮啦,個蛋好好食,同埋我哋做運動嘅,食蛋好,哈哈!而家我食得好清淡,變成習慣,只係食到7分飽,出街食嘅話,就要少鹽少甜少油少飯,啲碟頭飯啲汁好肥,唔好食咁多,同埋我唔多食炸嘢㗎。」考獲PT(Personal Trainer)及跑步教練資格的梁諾妍一副專家口脗。
連詩雅也開心Share:「我做運動前期,都跟餐單,但偶然之間會放縱下,當獎勵自己嘛,同埋日常都要有一啲社交生活同應酬嘅。我會喺屋企煮嘢食,唔會用好多調味料,其中好好食又有營養嘅就係焗三文魚嘞,加啲蒜蓉同檸檬汁跟住去焗就好香,同埋蛋白質豐富。雞脾肉去皮,加香草去煮都好食㗎!」梁諾妍補充:「做正確嘅運動,可以令到身體嘅肌肉增長,如果食物上可以配合到嘅話,效果會更加好。」下個月,梁諾妍又會去芝加哥參加她人生第5個馬拉松,而且在中環開設了一個運動Studio,正向她的運動事業一步步邁進。

運動不只是潮流
連詩雅和梁諾妍聚在一起,聊起跑步、Keep Fit,就話不完。
「我哋同一間公司,有一次大家都參加咗一啲女仔運動嘅Event ,覺得一班女仔一齊做運動都好開心。之後,我哋開始Friend咗,我哋仲一齊去挪威參加半馬㖭。」連詩雅繼續憶述:「那次半馬,我拉傷咗,仲要用拐杖拐下拐下咁行路,嗰陣時要包住隻腳咁去出Show,我好擔心,都會怕影響幕前嘅工作,令我之後有段時間怕咗做運動!」
不過,運動潮流愈來愈熱,關注健康的男女愈來愈多,連詩雅亦早再投入運動懷抱,甚至也想考一個PT資格。「做幕前,我鍾意演戲、亦鍾意唱歌,但係我自己都好貪心想多一個身份。喺2016年嗰個唱,體力都可以;去到2017年,因為要跳好多舞,身體再要操Fit啲,咪跟咗個PT,覺得唔錯、同埋Keep到自己一個唔錯狀態。做運動唔止係一個潮流,係一個健康嘅Life Style,同埋做Gym令到個身型都會靚啲,活到老時就冇咁多病痛。所以,我想去報讀一個Personal Trainer課程,唔止可以Keep到自己嘅體能,同埋有呢方面嘅豐富知識,真係可以幫到身邊人,特別係我媽咪啦,因為佢上咗年紀、身體冇乜肌肉,我希望讀完呢個Course之後,番嚟可以幫到我媽咪。」乖乖連詩雅的孝心和心思,梁諾妍十分支持。

和幸創作鐵板居酒屋
地址:灣仔摩理臣山道23號
南洋酒店2樓
電話:3460 4498
平均消費:約$280/位
泊車:時代廣場停車場
營業時間:11:30-14:30、
14:30-17:30、17:30-23:30

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。