娛樂

2017年8月24日

2017/08/11 (週五) 12:00上午

星情飯局 不要框着我 方健儀

相約方健儀(Akina)飯局,她想了幾天,然後提出去「咖啡事多」,「呢間舖頭喺海港城,好就腳㗎,同埋喺誠品裏面,又對住個海,環境唔錯,我覺得係幾好Hea嘅地方!」
這天的陽光普照,我和方健儀喝着咖啡、聊聊天,從店內的落地玻璃窗外望,海面閃着一片片鱗光,耀眼得很,一群鳥兒在天上翱翔,分外寫意。

撰文:Carrie Yip (carrieyip@msn.com)
攝影:Ronald
美術:Ronnie Cheung

我冇框框㗎
在主播熱潮的年間,被宅男追捧的都是眼大甜美的美人胚子,那個時候,Cool爆的方健儀是另類。「我完全唔係靚女,塊面比較方,又唔識得嗲、又唔笑得甜!但我一直唔覺得做新聞主播要笑晒咁對鏡頭,我只會努力做好分內事,觀眾係睇我嘅專業,而唔係個樣!」方健儀已經沒有做新聞主播5年了,但她的主播形象深入民心,時至今日仍未能洗底。
「以前嘅主播形象,我諗真係根深蒂固。曾經有朋友連我着條牛仔褲都話唔襯;又有客戶試過傾我以專業形象去Sell避孕套,呢啲都係外間仲畀我嘅框框、離唔開以前嘅影子。但我想話畀大家聽,我係冇框框㗎,我唔會刻意要去擺脫之前嘅新聞主播身份,但往後我只係想自己嘅Image,係由自己話事。」方健儀認真地繼續說,「就好似上年毛記搵我去唱歌,真係幾破格,我都覺得嗰次幾癲、仲有啲冒險,但反應都幾好!其實,依家嘅我幾有信心將搞笑同專業形象分開處理。」
人前大展歌喉,方健儀還客串過幾套電影,駕輕就熟又是專業人士。「有時着起成套套裝,照照鏡,都覺得自己幾Pro嘅。不過我都想試吓其他角色,最想係大反派,我好清楚自己嘅底線,重點就係唔可以扮無知婦人,做咩角色都唔緊要,係智慧型就得啦!」
內涵先襟睇
現在見方健儀出現很多不同的場合,打扮妝容Total Look都跟以前不一樣了。
「以前做港聞,見嘅人同事都樸實嘅,外表好其次。而從細我都唔貪靚、不修邊幅,瞓覺嗰件T恤,都可以着埋落街。我係做主播時先開始做吓Facial,只要自己個樣唔太差就OK!依家工作崗位唔一樣,客觀環境亦改變晒,依家所有嘢都闊咗好多,畀人話自己靚咗梗開心!」眼前的方健儀,輕輕呷一口咖啡,舉手投足之間,流露着點點女人味。
「女人隨着年紀增長,最緊要係修養、識得包容,個人知識增長係必要,有內涵先襟睇!」有腦袋的女人也會認同方健儀之言,漂亮外表不過是霎眼嬌,高素質的女人不只是糖衣。「呢一年間,好多人稱我為明星、名人、演員、KOL⋯⋯但我淨係想大家叫我前主播或者傳媒人咁就夠,有時我都唔清楚我自己嘅身份,“Who am I?”係我近排成日諗嘅一個問題。不過就算我係一個公眾人物,但都依然搭巴士、去大牌檔,其實你唔係去Care人哋點樣睇你,根本就冇人會理你!做MC、做幕前都唔知可以做幾耐?因為好多後浪,而世界亦愈嚟愈變得快。喺未來,我嘗試掌握嘅工作、做主動嘅一方,同埋同家人一齊去合作做一啲活動統籌,慢慢試一試!」
離開新聞主播崗位後的方健儀,正開展人生另一頁歷史,會比那些鳥兒飛得更高更遠。

咖啡事多
地址:尖沙咀梳士巴利道3號
星光行2樓誠品生活L203號舖
電話:2791 7128
平均消費:約$130/位
泊車:海港城停車場
營業時間:10:00-22:00

Carrie葉嘉儀

傳媒人。喜歡「吃」,皆因非只飽足五臟,更可透看人情。