娛樂

2018年6月26日

2018/06/14 (週四) 12:00上午

新戲肉搏3男 蔡卓妍笑吳慷仁似拍AV

近日蔡卓妍夥拍台灣藝人吳慷仁、吳浩康及林德信演出新片《非分熟女》,戲中患性冷感的她與眾男星上演親熱戲外,更首次性感上陣大跳鋼管舞!雖說只是意識上大膽,但聽到吳慷仁以半桶水廣東話說:「唔好含,含出嚟就冇事。」蔡卓妍都笑指好似拍緊AV!

蔡卓妍(阿Sa)昨日率領吳慷仁、吳浩康(Deep)、林德信(Alex)及葉童等,為主演英皇電影《非分熟女》進行開鏡儀式,老闆楊受成亦有現身支持。戲中阿Sa不但首次於熒幕上大跳鋼管舞,還會飾演一名患上性冷感的女仔,並分別與吳慷仁、Deep和Alex上演親熱戲,連阿Sa自己都認為是從影以來最複雜的角色。
談到早前特意上堂學鋼管舞,阿Sa大呻好艱難:「喺戲入面要做一個階段,由唔識去到識,都有啲轉圈動作。」問到可有性感演出?她笑謂:「上第一堂嗰陣,我着運動型嘅Bra Top同波褲,點知去到個個都着比堅尼,於是我都跟住除。(戲裏會着比堅尼?)都係一啲鋼管舞衫!」跟她有大量對手戲的吳慷仁,則謂有幸同場欣賞對方跳鋼管舞。
講廣東話出事
吳慷仁於片中飾演在港生活的台灣人,由於9成對白要用廣東話演繹,故他在台灣找了一個於當地開茶餐廳的香港人老闆學廣東話;而受訪期間,他亦嘗試以半鹹半淡的廣東話對答。不過,在旁的阿Sa就聽到忍不住偷笑,仲大爆對方幾乎令電影變色情片,她一邊爆笑、一邊憶述拍攝時鬧出的笑話:「佢有句對白本來係叫我『唔好喊』、『喊咗出嚟就冇事』但佢講咗『唔好含』、『含咗出嚟就冇事』,我就叫佢都係講番國語,如果唔係會變咗AV!」吳慷仁聞言亦忍俊不禁。
拍牀戲緊張
提到一幕講述阿Sa向Alex大騷鋼管舞,扮演一名怕醜仔的Alex就笑言:「希望係比堅尼啦,期待!(噴血?)應該會,我都試過跳鋼管舞,真係唔易,要大力同有技巧,我都有教佢一啲瑜伽動作。」至於為阿Sa獻出銀幕上第一次牀戲的Deep,雖然稱並非甚麼暴露鏡頭,純粹意識上大膽,但他直言好大壓力:「我緊張到事前諗到要做嘅都冇做,成日睇番條片,覺得好可惜冇做到!」