娛樂

2019年5月23日

2019/03/15 (週五) 12:00上午

放下執着 符致逸

踏入新一年,符致逸 (Adrian) 有不少大計,先出新歌《值得放棄》,本月將推出加盟環球後的首張大碟,又拍攝音樂特輯《City of Live》。一切看似順利,但Adrian透露出新歌前曾陷入創作危機,幸得好友相助才能順利出歌。

撰文:黃寶華
攝影:Sing
髮型: Isa Ng @Mi salon
服裝: ECCO shoes
化妝: NatalieSoo@ndnco
場地:The AIR (The ONE)

今次新歌《值得放棄》由林夕填詞,主題承接同樣由對方填詞的《恃愛行凶》,兩首歌道出Adrian與前女友分手到釋懷的過程。他表示新歌就如電影續集,展現了自己人生不同的階段,「 經過咁多年之後,我人又長大咗,開始慢慢將啲嘢睇通咗。《值得放棄》就代表我依家對呢個女仔嘅心態,人哋都結咗婚生埋小朋友,對我嚟講就係一個釋懷。」
創作不受限
新歌有別於以往,並非由Adrian親自作曲,是由T-Ma、馮允謙和GJ作曲。在新歌誕生前他曾陷入創作危機,「上年唔知點解,年頭好有動力會寫歌,但愈寫愈Feel到左右腦不停掙扎,跟住愈緊張啲嘢做得愈唔好,我監製Jim聽到覺得好平庸,公司有啲人好鍾意有啲唔鍾意,搞到我個人好亂,Keep咗半年,到7、8月有小小開竅,就去同T-Ma、馮允謙、GJ一齊寫歌。」
Adrian感激朋友拔刀相助,與他們合作亦帶給他不少反思,「其實呢首歌係我走出幕前,冇乜點參與創作嘅一件事,所以個感覺係好唔同。我之前好堅持每首歌都要係自己作,咁喺音樂上就有所局限。不過我依家就同自己講『喂!每首歌出街嘅,都要自己作,Forget It!』咁做音樂先好玩㗎嘛」。4年前Adrian裸辭做幕前,就是想生活變更好玩,既然如此,就不應當作曲是一份工作,「上年寫咗兩三首歌都唔收貨,可能就係呢個挫折,我就開始發現問題其實係我寫到嘢,但係諗太多,之後豁然同自己講Just Do It Man!一定會有個空間畀首歌生存。」然後目標就變得清晰。
百足咁多爪
Adrian透露本月推出的新碟會是廣東專輯,製作進度良好,「錄晒喇,差啲細微位,其實都八八九九㗎喇。呢隻廣東專輯包括我出過嘅廣東歌,仲會有多兩首大家未聽過嘅歌,其中有一首會派台。好鍾意將呢隻碟同我之前嘅碟《Good Morning Hard City》同一時間去聽,兩隻碟都係想將我內裏嘅情緒表達畀大家聽,但《Good Morning Hard City》嗰陣我仲做緊嘢,係探討人與人之間工作上嘅壓力,但呢一隻新碟,會探討多啲我Quit咗份工之後經歷嘅Emotions 。」
大計多多的Adrian,另一個計劃就是音樂特輯《City of Live》,特輯分別會於香港、台北、東京及上海拍攝,香港站則邀請了陳奕迅、盧冠廷及劉美君等歌手參與拍攝。Adrian指特輯將紀錄他由幕後走到幕前的經歷,而每個地方都有特別的意義,「台北就係我音樂嘅發迹地,我嘅音樂班底都喺晒嗰度,又會同一個原住民合唱一首台語歌。上海就關於我個Best Friend ,《靈魂獨舞》嗰個朋友,咁我可能就會重踏番佢舊時同我去玩嘅地方,攞番啲情感番嚟做啟發。東京係未來一條唔知點行嘅路,想去一個咁潮、咁實驗性嘅Market去玩,同埋我會喺當地玩廣東歌,睇吓日本人會唔會鍾意廣東歌。」

;