娛樂

2019年4月23日

2018/06/01 (週五) 12:00上午

擺脫MK 天堂鳥BOP

一出道就捲起MK POP風潮的天堂鳥,的確曾經Hit過一排,雖然不斷被網民取笑造型差、化妝濃、歌詞云云,但3子依然沒有放棄,堅持走音樂路,甚至也沒有後悔過以天堂鳥的身份出道,隊長Gordon更自豪地說:「天堂鳥不知幾好!」

撰文:林凱妍
攝影:Sing
服裝:levis_hongkong、Palladiumhk

最近在港出鏡率大大下降的天堂鳥,因為與舊公司的合約糾紛未完,在香港發展受阻,便改向內地發展,集中火力吸人仔,Gordon還笑說天堂鳥在內地相當有氣派,「大陸啲觀眾係好誇張㗎嘛,係咪都走埋嚟影相先,所以我哋喺嗰度攞到啲自豪感嘅,真係㗎!因為一落到車就有幾十個保安保護你,雖然佢哋都唔知我哋係邊個,但都好彩仲有內地市場幫一幫我哋呢段時間。」

MK POP的誕生
回想出道時的經歷,隊長Gordon坦言當初也有介意過團名,「好老實我哋聽到天堂鳥呢個名都『唉……』明啦,我哋最想緊梗係用英文名啦,但係無得揀,係誤打誤撞,天時地利人和,撞正咗天堂鳥呢個名出嚟。」
提到成名作《登陸太陽》,3子都不禁一笑,Lincoln更直言:「睇到出嚟成個畫面就諗點解咁似亞視,唔知咩年代㗎。」而Tyrese也笑指當時3人會一起看網民留言,一起笑,「因為我哋淨係負責拍,唔知要做啲咩,去到先知,跟住拍咗成日都係嗰個背景,冇離開過,我就話大鑊啦今次,但嗰時諗依家組合咁難做,點會咁容易出到名,出咗街有幾百人睇幾千人睇就算,點知幾百萬人睇過,所以一開頭大家個心態都係做一、兩年就唔做,返去做自己嘢啦!」

接受奇異目光
雖然3子都曾經有放棄的念頭,但念頭來得快去得也快,因為自尊不容許他們就此逃跑,Gordon笑謂:「好樣衰㗎!如果嗰時走,成世就淨係得《登陸太陽》呢首歌,冇得變。」Lincoln也非常有同感地說:「嗰陣時一出街,啲人望我哋對隻眼已經好奇怪,迫使咗我哋Keep住做,同埋嗰時有安排一啲訪問,真係有工作去做,每日都好充實,好想扭轉個形象,就Keep住咗呢個無底深潭。」
即使《登陸太陽》讓他們成為全城笑柄,3子依然沒有後悔過踏出當初那一步,Gordon甚至很感謝這首成名作的出現,「無可否認《登陸太陽》係幫咗我哋好多嘅,即係起碼到依家咁少宣傳,喺街度都有人認得我哋,就係因為呢首歌,我都好多謝,成名作嚟㗎嘛。」

從此再無底線
對於天堂鳥來說,由出道起已經毫無形象的好處就是再無任何限制,Gordon指好友馬天佑也曾經為此開解過他們,「佢同我哋講,其實你哋唔使怕啲咩形象,最盡已經玩過,咁玩盡啲冇所謂,佢講得都啱嘅,做娛樂圈真係要百變,唔可以淨係恤衫西褲,出嚟就冇嘢睇,人哋會話又係咁呀,好悶㗎嘛!如果我哋有一個咁嘅形象係可以做到百變,我都開心㗎。」
話雖如此,Gordon也很想擺脫大家對天堂鳥的既定印象,邁出新的一步,「希望真係有一首歌,我哋出番嚟係會有變,我哋都希望可以有一個改變嘅形象,但係冇辦法,控制唔到人哋嘅思想,咁我哋盡力去改囉,起碼染番黑啲頭髮、放棄眼線先啦!」看來改變的決心十足,那就一起期待天堂鳥帶來新的一面吧!