娛樂

2018年6月24日

2018/03/14 (週三) 12:00上午

撬開金口 捉古天樂上台唱歌 王梓軒扮熟被藐?

曾出過4張唱片的古天樂近年專注電影發展,不但放棄唱歌,更表現得極為抗拒。不過前晚他出席晚宴期間,卻被王梓軒等幾個後輩挾上台,半推半就下唱出當年的金曲《男朋友》。有網友就留意到王梓軒遭到無視,即使想與古天樂“High Five”亦不得要領,場面尷尬,不過他就堅稱:「我冇嘅。」

古天樂(古仔)早年憑《尋秦記》等劇集爆紅,演而優則唱,不過他其後「封咪」, 甚至自爆好憎唱歌,自此唱歌儼如他的黑歷史一樣,除了為電影唱主題曲或偶爾在周年晚宴等大型場合開金口外,基本上冇人能逼古仔唱歌。古仔今年初獲選為新任香港演藝人協會主席,昨晚他現身香港電影工作者總會春茗時竟被擺上枱,焗住開金口獻唱!
事緣他去年為電影《殺破狼.貪狼》翻唱過《月亮代表我的心》,當J.Arie(雷深如)正唱出此曲時,王梓軒突然問:「古會長喺邊呀?呢首歌係佢唱㗎喎,歡迎古生!」他試圖將咪遞向古仔,惜對方搖搖頭,令王梓軒慘食檸檬。古仔「中伏」走上台後,音樂突然一轉變成《男朋友》,只見他一臉尷尬並且硬晒軚,最終在J.Arie、王梓軒及小肥等等夾擊下,古仔只得無可奈何唱幾句,而由於王梓軒唱得好大聲,更將古仔的聲線完美覆蓋。
J.Arie事後將片段放上網,並留言:「人生有咩癲得過,喺古天樂先生面前,大大聲聲唱佢嘅金曲《男朋友》?佢中途真係有開金口唱㗎!好爆……真係好爆,因為從來冇人夠膽喺佢面前唱,多謝我嘅No.1偶像古生!」

否認被無視
除了古仔激罕獻唱外,有網友就將重點放在王梓軒身上,指他嘗試與古仔做出“High Five”動作,卻遭無視及藐爆,只得死死地氣將手放低扮冇事,不過王梓軒就指只是一場誤會,他解釋:「嗰刻大家都喺度打緊拍子揮緊手,可能角度好似我伸緊手畀古生,其實本身係好In general咁“Yo!”,嗰晚係好高興。」身為演藝人協會副秘書長的他又指演藝人協會換屆後士氣高昂,有很多事想做,所以他與古仔間絕冇矛盾,又表示:「之後都有同古天樂先生講唔好意思,無啦啦拉咗佢上台,其實佢事前唔知道。我哋一時興起拉咗佢上台,佢都好大方,上嚟同我哋玩……我冇嘅,大家都好開心!」