娛樂

2017年7月22日

2017/05/19 (週五) 12:00上午

康城時裝災難 大陸女星騎呢踩場

一年一度的康城影展影展昨日開幕,每年都出盡法寶搶鏡的范冰冰今年升呢做評審,以一身充滿仙氣的藍綠色禮服登場,氣勢完全唔同晒!其他大陸女星要搶鏡,惟有以騎呢取勝,有人著到成棵白菜一樣,有人成身插滿羽毛,又有人扮淋浴球,最勁的是有人直頭將國旗着上身,不過大家最想知的都是,究竟佢哋係邊位,同埋點解可以出席影展?

雖然向來打扮誇張的范冰冰今年改走氣質路線,不過紅地毯一樣不會悶,皆因有一班大陸女星以浮誇取勝。去年被指穿上大型垃圾袋現身的李宇春,今年繼續承接上年的主題,改將垃圾袋放上腳,縐到起摺的長Boot配上超短熱褲,夠晒驚嚇!不過一山還有一山高,拍過《3D肉蒲團》的女星藍燕就以黑白高衩裙配超誇張頭飾,手執黑色扇,騎呢度滿分。
另外有女星穿上畫上翻版卡通人物的白色長裙現身,唔知靈感是否來自安祖連娜祖莉的手繪婚紗呢?但要數到最誇張,一定是大陸的網絡主播徐大寶,竟然將五星紅旗着上身,娘味十足,就連網友都睇唔過眼,指她不但冇品味,影響到紅地毯的觀感,而且仲話改裝國旗可能犯法㖭!