娛樂

2017年9月20日

2017/07/17 (週一) 12:00上午

唔熱咩? 疑長袖遮傷痕 何雁詩堅稱:我冇自殺!

一早認有情緒病的何雁詩早前傳鎅手自殘,事後死口唔認的她卻頻頻以長袖衫示人。昨日於30度高溫下,何雁詩仍穿上長袖外套現身活動,對於日前上載的照片疑洩手臂傷痕,她繼續封口表示:「只可以話我冇自殺!」至於被指搭上新歡,她強調與男友鄭俊弘感情不變!

何雁詩與鄭俊弘(Fred)於今年4月被揭暗中撻着,惟男方原來早有未婚妻Beebs,令兩人形象插水!然而背負「小三」之名的何雁詩一直受情緒病困擾,早前更有傳因醉酒鎅手自殘而送院,雖然6月初已否認自殺及割脈,但連月來均以長袖衫示人,加上日前於社交網上載的照片中,其左手前臂疑貼上去疤貼,令傳聞甚囂塵上。而另有報道指「雁鄭戀」疑見光死,女方近日被拍得與新歡拖到實之餘,還於社交網留言稱要重新開始㖭!
昨日天氣酷熱,何雁詩偕王浩信出席活動時,居然仍穿長裙加長袖外套現身,真係睇見都流汗!對於日前於社交網寫上「何去何從」,她解釋謂:「我唔係講感情,我都係正常人,要學識以後喺社交網唔好再想負面情緒。」談到前臂貼上去疤貼的照片疑洩露自殘傷痕,問到是否不再上載短袖或冇袖照?何雁詩即煞有介事稱:「呢排會靜啲先,少啲擺相。(所以今日唔着短袖?)係,之前都講過好多次,唔想再交代。(點解又放相上網?)都明白嘅,只可以話我冇自殺,其他嘢唔回應。」
跟Fred感情不變
當被追問手上兩條痕是甚麼時,何雁詩即封口不作回應:「我冇認真去睇清楚,唔回應。(係疤痕?)唔答。」提及吳綺莉女兒卓林鎅手亦有勇氣承認,她繼續迴避答:「我係公眾人物,講嘢要小心啲,做乜都會小心啲。(以後少啲Po相?)係,唔想因為私人事搞到好似博見報咁。」至於被影到與「嫩版陳智燊」拖手一事,她澄清對方乃認識多年的中學同學,並強調跟男友感情不變。講到Fred的工作量大減,何雁詩即撐對方有拍廣告和MV,問到可覺自己拖累男友?她直言:「冇得咁計,唔想有任何情緒影響工作。(佢情緒OK?)個個都有情緒,但見佢幾開心,成日彈結他。」