娛樂

2018年8月21日

2018/05/18 (週五) 12:00上午

台下的女主角 劉嘉玲

究竟劉嘉玲和梁朝偉誰的演技更勝一籌?
記得今年農曆新年,兩公婆分別主演的賀歲片打對台,當時梁朝偉自詡比太太搞笑,劉嘉玲卻自問演得好過對方,更拒絕「夫妻檔」拍戲,皆因她認為兩個分分鐘傾唔掂數會打交!鏡頭前,隔空都擦出巨大火花,私下的戲劇交流想必更精采,劉嘉玲卻否認並笑謂:「佢係一個好偉大、好有魅力嘅香港演員,所以喺演戲方面嘅專業上,我唔會同佢爭拗,我覺得佢都係高我一籌,但我都唔差囉!」即將於暑假上演舞台劇《奪命証人》的她,更「開綠燈」盼與老公再於舞台上合作,重拾初戀的感覺。

撰文:黎寶倫
攝影:ChaseK
化妝:+0
髮型:Ken Hui@ii Alchemy
服裝:DIOR
場地:英皇駿景酒店

大概4年前,劉嘉玲夥拍梁家輝、謝君豪主演毛俊輝執導的舞台劇《杜老誌》,當時公演10場後好評如潮,結果加開至41場。此後,該劇不單止令嘉玲榮登「香港舞台劇最佳女主角」,更使她對舞台劇產生濃厚興趣,希望每隔兩、三年就上一次舞台。終於,今年的7、8月嘉玲再與同一班底合作,假香港演藝學院上演舞台劇《奪命証人》;是次,除了故事從舞廳轉移至法庭外,身邊的梁家輝亦換上另一好戲之人──秦沛(Paul哥)。

向秦沛學嘢
記得上月舉行記招,縱橫影壇約70年的Paul哥竟不諱言,這次處男下海做舞台劇非常緊張,仲叫嘉玲和君豪到時睇住自己。作為後輩的嘉玲又可夠膽指導對方呢?她笑謂:「點會請教我哋,我唔敢當呀!我同君豪都係睇佢嘅戲長大㗎,佢好識做戲,真係老戲骨嚟,反而係我要同佢多多學嘢,請多多指教阿Paul哥。所以我完全唔擔心佢會有咩問題,同埋毛Sir(毛俊輝)係非常之有導演風範去處理成件事,因為佢本身都係話劇演員出身,好清楚演員喺過程中會遇到啲咩問題,所以佢會帶領我哋去正確嘅方向。」
說到Paul哥最擔心忘記台詞,甚至遠從多倫多致電嘉玲諮詢意見,當時她則以「驚就兩份驚」來鼓勵對方,「我哋個個都會經歷呢啲階段,會驚唔記得對白、舞台會發生咩意外,但就係好玩在Live㗎嘛,有好多變化、好多突發嘅嘢,你就要去控制佢、處理佢。」而今次嘉玲最大的挑戰,正正就是要背幾十頁紙的法庭對白。

200%集中力
回想上次40多場演出,雖未發生忘詞的情況,但少少「甩轆」亦總會有,「當我覺得自己完全記好晒對白、台位,好淡定、放鬆嗰陣我就會跣胎,所以喺舞台真係要百分之二百嘅集中精神,唔係我一個人喎,係台前幕後都要,因為係唔可以錯少少嘢㗎,音響、燈光、道具……全部都要好嚴謹、嚴肅去處理。」

對於不少演員來說,高度的專注力是排練、上演期間必須的,好似伍詠薇就索性與老公短暫「分居」。那麼擁35年演出經驗的嘉玲是如何作出調整呢?「其實由依家開始,我就要將心情校到一個好正常嘅位置,要好有規律地早睡早起、運動、注意飲食,因為呢個話劇係冇B角,淨係得A角,觀眾係因為我哋3個人入嚟睇嘅,所以冇得請假、冇得身體唔舒服,一定要有好好體力、精神先可以做到。」笑問有否叮囑丈夫梁朝偉(偉仔)切勿騷擾?她哈哈大笑道:「嘿,佢平時都唔講嘢㗎!」

同老公鬥戲
事實上於戲劇方面,偉仔私下都經常給予太太意見,就如上次看畢《杜》劇後,他也會分享自己的觀後感,又會想像如何演繹別人的角色,嘉玲說:「佢對呢樣嘢都好有熱情㗎,希望撩起佢條癮做舞台劇啦,佢成日都擔心喺台上會唔記得對白,但我覺得佢太多顧慮。」還笑稱並非賣花讚花香,其實老公也是一個既偉大又有魅力的香港演員,至於誰的演技略勝一籌?她打趣道:「睇下咩戲囉,旗鼓相當㗎!」
初出道的嘉玲與偉仔合作無間,直至演舞台劇《花心大丈夫》才擦出愛火,而上一次同片,已是04年的電影《2046》了。跟大部分人一樣,擔心惹拗撬的嘉玲亦一直很抗拒與老公共事,不過,要欣賞「影帝、影后」級夫婦的同台演出,現在似乎有了轉機,「電視、電影就無謂嘞,但舞台劇我覺得可以㗎,因為舞台劇係比電影、電視劇更加嚴肅、認真,我覺得導演會有自己嘅一套處理方法,同埋我哋係《花》劇先開始呢段戀情,所以舞台對我哋嚟講係一個好有緣嘅地方。」