娛樂

2018年9月24日

2018/04/17 (週二) 12:00上午

出爐影帝古天樂 拒評黃秋生「中國電影」論

一年一度的金像獎頒獎典禮前晚曲終人散,今屆不單止賽果成為全城話題,就連頒獎嘉賓的言論都令大家議論紛紛,事關黃秋生在台上爆出一句:「出年仲有冇香港電影?」疑似寸成龍的「中國電影」論。對此,出爐影帝古天樂則謂不作評論,事後黃秋生就堅稱言論不是針對成龍。

《第37屆香港電影金像獎頒獎典禮》前晚終於圓滿結束,當中不少精采場面掀起網民熱議,除了古天樂(古仔)和毛舜筠首奪影帝、影后外,「終身成就獎」得主楚原於台上的肺腑之言亦令人印象深刻。而數到最「爆」一幕,相信是黃秋生於頒發「最佳編劇」前的一段說話,事關他談到寫劇本的最重要元素是,既要出人意表又要情理之中、意料之外,接着秋生寸爆舉例說:「出年仲有冇香港電影呢?呢個就出人意表,但情理之中、意料之外。喂,我哋年年都有香港電影喎,好合理呀!係咪呀?」結果此言一出,引來各界猜測他疑似針對成龍早前所發表的「中國電影」論。
否認針對成龍
對此,秋生昨日回應傳媒指講稿度了一星期,大會過目後也未有作出修改。說到演講結尾獲讚精采,他說:「以為大家唔明,內容係切合大會主題,為香港電影打氣,成日都話香港電影已死,我唔係要話邊個,我想講成段嘢唔係針對佢(成龍)。」並謂不擔心跟成龍碰面會尷尬,又強調純粹想鼓勵香港電影人,他續道:「呢番話人人成日講,唔係話佢,只不過佢番話大家好記得,而且知成龍個人好大量,係佢優點。」
不同的表達方法
至於出爐影帝古仔前晚就偕毛舜筠、姜皓文(黑仔)和葉德嫻等一齊搞慶功宴。對於秋生的一番言論,古仔說:「每個人有自己嘅表達方法,佢只係講自己想講嘅嘢,我就唔評論喇。(佢話唔知下年仲有冇香港電影!)我有自己嘅諗法,就係做好電影!」問到可有下一個目標?古仔笑謂:「有,就係做好手頭上嘅嘢,但依家最想返屋企瞓覺,因為第二日(即昨日)要開工。」
黑仔老婆好體貼
首奪「金像男配角」的黑仔,提到於台上忘記答謝太太, 即耍冧說:「老婆叫我唔好成日喺出面講佢,叫我有機會就多謝同我合作過嘅人同老闆,老婆比我更加識大體。」他又自言性格火爆,對方經常遷就自己,如今會收「火」,更不介意充當老婆的出氣袋。此外,情緒持續激動的毛舜筠表示仍未告知老公喜訊,她說:「作為一個演員辛苦咗幾十年,早幾年得過女配角,依家女主角,真係好滿足。」