娛樂

2018年6月24日

2018/03/15 (週四) 12:00上午

冇否認同劉浩龍分手 容祖兒: 係互相支持嘅狀態

容祖兒與劉浩龍拍拖5年,近日卻盛傳分手,指女方寧願一個人去旅行或者陪朋友都不跟男友見面。一直冇回應分手傳聞的容祖兒,昨日出席首飾品牌活動時絕口不提感情狀況,亦冇否認分手,但看上去心情不俗,全程笑晒口。直至有人提起劉浩龍開騷前突然傳「分訊」,被網友質疑是宣傳手法的一種,容祖兒即面色一沉說:「你哋覺得咁樣係得㗎咩? 」講到依家咩關係?她就指係互相支持的狀態。

容祖兒與劉浩龍(師兄)12年爆戀情,雖然起初不被外界睇好,不過兩人仍無懼外來壓力,相愛5年幾。可惜近日盛傳兩人已分手,有指雙方為低調處理分訊,一直未有回應,只見忙着籌備演唱會的師兄寄情運動,游水、跑步、踢波樣樣齊,而祖兒回港後就忙着工作、見朋友和照顧寵物。
自爆「分訊」後,昨日她首現身出席品牌活動時笑容滿面、任影唔嬲,也自言心情不錯,記者問她是否已經「放低」,祖兒煞有介事回應:「你哋意思係?你哋講嗰件事,我諗住唔回應。」被問是否與師兄分手,祖兒表明自己一向不習慣與人分享愛情事,以免再衍生其他新聞,對於目前感情狀況,她表示:「我嘅Status係努力工作中,係咪好老土?(但如果你一直唔講,一直都會掛住人哋女朋友個名?)以我經驗話我聽,依一刻嘅我,最好係所有嘢唔講咁多。」
開口維護師兄
談到關係是否未有定案,祖兒謂:「冇乜嘢要補充同交代,我嚟緊要去台灣同內地錄兩隻碟,師兄又要做演唱會,大家互相努力、關心同支持大家最重要。」有指今次傳分手,其中一個原因是老闆楊受成一直擔心愛將遭利用,早年他曾講過希望師兄是真心愛祖兒,冇其他目的,問到這是否為祖兒帶來壓力,她便維護師兄說:「從來冇人對我有目的,大家都係愛錫我。」
被問是否已準備好迎接新戀情,她笑言:「哎呀,太多事情發生嘅時候,我未處理到,要努力工作先。」雖然祖兒一直表現出高EQ,但當講到有網友認為突然傳「分訊」,與師兄演唱會宣傳期不謀而合,她聽罷皺一皺眉說:「你哋覺得咁樣係得㗎咩?大家都係現代人,呢樣嘢唔係我哋自己攞出嚟講,總之依家係互相支持嘅狀態。」