娛樂

2018年1月16日

2018/01/12 (週五) 12:00上午

享受中感受 洪永城

當旅遊主持,洪永城(Tony)已經走過大半個地球,是前輩級;至於演員身份,由2014年首次參與《單戀雙城》計起,4年光景,經驗不算多,但早前播出的《降魔的》及《使徒行者2》,也有觀眾讚賞洪永城的客串演出。
今天,和洪永城飯局,談到主持旅遊節目開心?還是拍劇過癮?他認真的告訴我,是兩種不同的享受。

撰文:Carrie Yip(carrieyip@msn.com)
攝影:Ronald
美術:Ronnie Cheung

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。

好好學習
「其實《使徒行者2》裏面,本來有一個多啲戲分嘅角色,但咁啱時間夾唔到,就客串啦,我都覺得好可惜,不過令到觀眾有深刻印象,都好開心;喺《降魔的》演一個瘋狂嘅粉絲,就真係我主動開口去問嘅,所以好多謝監製肯畀我去試,或者係一集嘅角色,比較冇乜包袱,咁可以演得較放啲啦。」得到認同和欣賞,是不少演員的強心針,但洪永城自言仍要跟不少前輩學習,如剛和張衞健拍完的《大帥哥》。
「我視張衞健係師傅,喺佢身上真係學到嘢!現場睇佢拍《大帥哥》,佢加咗一啲自己度嘅嘢,就當堂唔同咗,會幫到個故仔、幫到套劇,多咗啲深度同意思,可能只係一啲細微嘅位,但就係要喺佢呢啲前輩身上先至睇到、學到。我好鍾意接到一啲有戲味嘅劇集,長又好、短又好,可以跟到多啲前輩學嘢,我好相信TVB入邊有好多好有實力嘅演員,每一次合作都係我一個好好嘅學習機會。」
除了學習機會,在緊湊的拍劇日子裏,也可以和劇中拍檔變成往後的老友。「我同《大帥哥》其中嘅一啲演員,曹永廉、李嘉等都相處得好開心,依家就算套劇拍完,都有Keep住聯絡,好珍惜大家呢段友情。所以今次就梗係去李嘉開嘅台灣食店『古早味』,又好食,當然要支持。」
實行善遊
飯局之時,洪永城說:「《大帥哥》可能會喺今年頭一季出街!」但是最新消息,洪永城另一套有份拍的《波士早晨》會早過《大帥哥》於下月播出,陪大家過年!
拍劇歸拍劇,洪永城那種紀錄片式旅遊節目,打不死的精神,不乏捧場觀眾。不過,拍了那麼多旅遊節目,地球就是那麼大,在旅遊節目中加添新意,才是洪永城目前注重的。
「我會去台灣拍攝新旅遊節目《愛在遙遠的地方》,想將旅遊同埋電視電影嘅組合出嚟畀大家睇,希望會比單純嘅吃喝玩樂再高一啲層次啦。我覺得喺每次旅程當中,其實有更加多嘅得着,譬如:友情。旅遊節目仲可以有好多嘢加入去嘅,唔止係傳統嘅做法。身為一個旅遊主持,自己都想為旅遊業做多一啲嘢。」洪永城繼續說:「我Set Up咗『善遊(Travelkind)』呢個香港嘅平台,好想幫吓人、同埋回饋一啲嘢畀社會。我覺得依家要種更加多嘅『因』,跟住有一日先會可以收穫更加多嘅『果』。」洪永城成立「善遊」,是因為一次親身去西藏探訪當地盲人學校後,有深刻的領悟而實行出來。
如洪永城說,我們身處香港,是一個幸福地方,但今天有很多人仍不懂當中的緊扣關係。

古早味
地址:銅鑼灣駱克道491-499號
京都廣場5樓
電話:3421 1765
平均消費:約$120/位
泊車:世貿中心停車場
營業時間:11:00-02:00