財經

2019年5月19日

2019/05/16 (週四) 12:00上午

中環八羽茶室 滙豐新噱頭創「戶外羽球」

喺中環返工嘅一班金融業才俊,好多都係文武雙全,只不過當年可能因為事業,最終放棄自己嘅興趣同強項。八羽茶室亦有唔少才俊鍾意吹噓自己做運動嘅威水史,仲提到龍頭銀行滙豐同世界羽毛球聯合會聯手推出一項新嘅戶外羽毛球運動,重燃自己心入面團火。
喺滙豐MT出身嘅「港版林丹」、而家喺另一投行做緊高層嘅Philip話,有舊同事同佢講,滙豐最近同世界羽總搞咗個全新嘅戶外運動──「戶外羽球」(AirShuttle)。呢項運動旨在可以畀所有人隨時隨地享受羽毛球嘅樂趣,無論喺硬地、草地或者沙地,都可以全天候打羽毛球咁話。Philip話,呢項運動將會開發全新嘅戶外專用羽毛球,提供更耐用、穩定同抗風嘅能力。
熱愛打羽毛球嘅基金經理Angus就話,其實羽毛球係非常流行嘅運動,佢以前都參與唔少校隊同青年軍,只不過而家大咗三個碼啫,跑唔郁咁解啫。Angus仲話,對佢哋呢啲成日坐喺Office對住個Mon嘅人嚟講,打羽毛球係一種好好嘅減肥運動,只要打一個鐘就可以燃燒超過 450卡路里!
擅長企業管治嘅張總搭訕話,若然公司可以多啲搞下呢啲活動一齊做下運動,除咗提升士氣之餘,仲可以保持員工身體健康,員工有得「打波」強身健體,就唔使「射波」啦!
佢仲建議滙豐可以學似某啲地產商或者銀行咁,定期舉辦呢項運動嘅大型比賽,自創一項城中盛事,咁就可以增加曝光率之餘,仲有助建立企業重視體育嘅形象咁話!

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!

;