娛樂

2017年10月17日

2017/08/11 (週五) 12:00上午

不是老餅 Michael learns to rock

要數90年代最Hit 的英文歌, 《THAT’S WHY(You Go Away)》 絕對有份!
主唱的丹麥天團Michael Learns To Rock(MLTR)幾十年來創作的經典歌曲無數,《Take me to your heart》更是張學友《吻別》的原版,就算未聽過他們的大名,都一定會聽過他們的作品。相隔20年,3位成員Jascha Richter、Mikkel Lentz 和Kåre Wanscher將於本月22日再度來港開演唱會,不過唱足30年的他們卻坦言不會認老,會一直唱落去,讓粉絲可以帶住仔女,甚至孫仔一齊來睇騷。

撰文:鄺蔚霆 攝影:Eddy

近年MLTR到過台灣、澳門和廣州等多個亞洲地方開騷,儲落大批粉絲,他們笑言自己的粉絲不但有不同的國籍,甚至年紀都相距甚遠,Jascha笑言:「有啲我哋嘅粉絲,會帶埋佢哋嘅仔女嚟睇騷,不過我哋粉絲年紀最老都只係54歲,因為我54歲,哈哈!」
接下來展開的中國巡迴演唱會,他們就再次顯示出3人勇於創新的勇氣,破天荒與中國女歌手楊斯捷合作,他們更大讚對方有實力,「我哋合唱咗首歌《Eternal love》 ,佢好有才華,估唔到佢雖然細細粒,但係把聲咁厚,我哋前排已經為首歌去咗深圳拍MV。」愈來愈多新嘗試,話唔定下一步就會變成 “Michael Learns Chinese” 。
計劃多多
雖然創作過多首經典歌曲,但MLTR卻笑言,心目中的完美情歌不是自己的作品,Jascha最喜歡《All By Myself 》,他笑謂:「我第一次聽係16歲,嗰陣已經係鋼琴手,一聽呢首歌即刻識彈,跟住就踏上唱作歌手呢條路。」
而Kåre則最愛Stevie Wonder的《Lately》,不過當被要求清唱兩句時,他立即笑說:「我唔得㗎,呢首歌好高難度!」他們又表示踏入成軍30年,會有更多的計劃要實行,Mikkel表示:「30年聽落真係幾老!其實我哋都有未落實做咩,可能會寫首新歌。」
練成默契
作為唱作樂隊,少不免會遇到「腦閉塞」的日子,身為主音的Jascha卻自有一套「開腦方法」,「冇靈感都冇乜嘢可以做到,惟有喺間屋全日吸塵清潔吓。」身旁的Mikkel立即爆料,指對方會執屋全因潔癖,可能同「腦閉塞」無關,「你應該要走去望吓佢間屋,真係非常乾淨,佢成日都會抹屋。」
合作多年,3人亦練成一定的默契,就算嗌交都一定會搞得掂,「我哋唔會打交,只會討論件事,如果Jascha作咗首歌出嚟,而Mikkel想完全轉過晒啲歌詞,Jascha就會擁有最後話事權,可以Say No啦,因為佢係創作首歌嗰個。」目前他們最激烈討論的,相信都是如何創作新歌,「我哋都有一個目標,就係作多啲好歌,只係有時我哋會為點樣去達到嗰個目標,而有唔同意見。」