娛樂

2019年6月25日

2019/01/11 (週五) 12:00上午

一個人在途上 張惠雅Regen

合久必分是香港組合的宿命,去年HotCha重組,將Regen、Winkie及Crystal再次合體舉辦紀念個唱,勾起八、 九十後的集體回憶。但結束後三人各奔前程,Regen(張惠雅)再次踏上一個人的旅途,自我沉澱尋找旅行的意義。好奇寶寶上身的她說:「以前我太細個入行,好多嘢都未試過,我好想去多啲唔同嘅地方!」但同時她更喜歡杯中之物,最近還化身為調酒師,在The 747 Galley by Cafe Proud Wings為食客奉上一杯Freestyle的雞尾酒。撰文:甘偉丁|攝影:ChaseK

愛喝酒到愛調酒
Regen自言以前不懂喝酒的真諦,純粹只想與好友們打成一片,視飲酒只是聯誼的節目,又曾試過因好奇心喝到斷片。「有次同Winkie飲,佢問我係咪千杯不醉,話不如飲啲好勁嘅酒,嗌咗杯點火嘅林寶堅尼,一嘢飲完都無嘢,再飲第二杯都無事。到之後牛扒嚟咗啦,好記得食到第二嚿就突然趴咗喺枱。但嗰時我意識都清楚嘅,不過已經郁唔到,話要返屋企。我嗰時仲要醉到跌咗落個花槽,好彩有佢扶住我,不過第日要開工仲識得校鬧鐘嘅。」
後來Regen在11年離開HotCha,隻身前往澳洲展開Working Holiday。「個時一轉咗經理人就無咩嘢做,係個樽頸位,試過半年都無工開,模又開始興起,商場Show愈來愈少,覺得係時候畀個機會自己走。去到當地就開始鍾意飲Wine,原來好好飲嘅紅酒真係好好飲。嗰時做侍應一放工就會開支酒係度飲,覺得好完美好舒服!」
開餐廳做慈善
因為愛喝酒,繼而令Regen開始研究雞尾酒。「嗰時識到個朋友係調酒師,成日都會喺屋企整Cocktail,但以前對Cocktail嘅諗法就係Kimberly Juice加Vodka咁簡單,再Mix少少嘢。」因緣際會下結識到現時餐廳的老闆Anthony及調酒師,他們更向Regen介紹不同的Cocktail。「雖然真正學都係嚿年先開始,但對Cocktail認知都好長時間,大約知每隻酒入面個味係點。所以我就算Freestyle整杯酒出嚟,個味道都好OK。特別鍾意酸啲、苦苦哋或者辣辣哋嘅味,唔鍾意甜嘅,去玩一定會飲Tequila同Margarita。」
去年4月,Regen與友人合資開餐廳,餐廳以飛機做主題,陳列了不少飛機模型外,還設有飛機艙座位、入座又會提供登機證給食客,體驗有如登機的感覺,全因Partner是飛機迷,Regen直言裝修沒有參與太多,主力幫忙宣傳。而最近,就以餐廳名義做善事,希望可以回饋社會,「因為覺得既然大家都想Gathering,不如做啲有意義嘅事啦!嚿年餐廳整咗啲磨菇湯同麵包,試過係Instagram召集義工一齊去公園附近派湯畀露宿者。」
五光十色的娛樂圈雖然吸引,但原來Regen更喜歡旅行,藉此釋放壓力清走負面情緒。「 我會考之前已經簽咗畀公司,嗰時乜都未試過。係去澳洲Working Holiday之前,試過一個人去泰國玩,發覺原來好正喎!就係試過一次後就上癮。」去完澳洲假期之後,她表示最印象深刻的旅行是尼泊爾。「嗰次去行Poon Hill(布恩山),因為好鍾意睇日出日落。乜都無準備,人愈細個膽就愈大,因為依家去 Backpack Trip,差唔多係最大年紀嗰個,因為我睇番人哋個年齡都係20頭,我當初去尼泊爾都係20頭咋。但依家我去西藏會Plan多咗,會做足晒準備食晒藥先去。同埋覺得一個人去旅行會識到好多朋友㗎!之前喺西藏玩識咗好多小鮮肉,都有Keep住聯絡,但始終距離問題好難成日約到。我同我個Best Friend講,因為佢30幾歲都無拍拖,真係要試一次一個人去旅行呀,會識到好多男仔㗎!」難怪經常在她的Instagram都會見到旅行的相片。
30歲作為人生的轉捩點,自然想有轉變。計劃多多的Regen表示希望繼續進修中醫課程外,又想去多啲地方擴闊視野,曾在29歲時經常掙扎何時結婚生仔?「到咗依家30歲,我覺得一切隨緣,因為我都三年幾無拍過拖,之前我去咗江若琳個禮婚,都好想好似佢哋咁,識耐啲了解咗先再一起。如果將來有小朋友,我都想帶埋佢去旅行!」將來如何無人知道,凡事順其自然,相信對的人就會在適當的時候出現。

The 747 Galley by Cafe Proud Wings
地址:大角咀嘉善街39號地舖
電話:3590 3787
營業時間:12:00-00:00(星期一至五)、17:00-00:00(星期六及日)

;