即時

2018年12月20日

2016/10/12 (週三) 01:29上午

【晒冷】現身ViuTV 節目巡禮 譚詠麟唔驚「倒戈」激嬲無綫

ViuTV開台半年,未到台慶已經舉行節目巡禮,除了旗下藝人外,華納唱片、太陽娛樂及環球唱片都有派人到場,大概有60位藝人,比開台時更疊馬,就連「校長」譚詠麟都有到場!問到會否擔心倒戈得罪無綫,譚詠麟就指未驚過,並笑言:「我係世界Friend嚟,流住香港人嘅血。」對方係咪咁諗先?

ViuTV舉行「2017年節目發布會」,強調「當選擇變成更多選擇」。除了實況娛樂外,ViuTV英文電視頻道ViuTVsix 96台將於明年3月31日啟播,同時將拍攝更多自家劇集,並主打音樂節目。

活動上,譚詠麟(阿倫)就率領各歌手及演員大叫口號,他宣傳自己的新節目《譚校長.談欣賞》時,重申自己不收分文,並非擔任主持,又賣口乖地說:「ViuTV見到我新碟呢個Project好盛大,覺得好有價值,可以好似Documentary咁拍攝當中嘅花絮,我好多謝佢哋咁識貨,派出龐大嘅後勤支援,跟我去東南亞拍嘢同錄音,暫定有9個嘉賓。」

環球近年與無綫關係麻麻,環球旗下的阿倫還不斷讚ViuTV,難免令人認為他倒戈打無綫,但阿倫就否認謂:「我係世界Friend嚟,流住香港人嘅血,TVB無咁小器嘅!」同場的許志安亦不擔心幫ViuTV音樂節目做嘉賓會激嬲無綫。節目發布會星光熠熠,多間唱片公司都派出多名旗下歌手撐場,惟獨英皇只見吳浩康一人,製作部副總裁金廣誠就解釋:「我哋都有聯絡英皇,佢哋啲人今次唔係咁得閒。(佢哋同無綫關係友好,唔敢嚟?)呢方面我哋冇考究。」有傳ViuTV曾找蔡卓妍拍劇,他直認有洽談過,惟對方暫時未有期。另外,有報道指ViuTV開台首季蝕6,800萬元,可謂大出血,不過金廣誠卻笑言會繼續為公司花錢,高層亦不會「閂水喉」。

此外,劉浩龍(師兄)亦以歌手身份現身撐ViuTV,對於早前徐濠縈在私人Instagram貼的陳子聰病愈近照流出,有指激嬲了陳子聰老婆何超儀,令兩女反目成仇,師兄表示:「我好少咁肯定去講一樣嘢,但我敢寫包單唔會!都係娛樂新聞炒作啫,成班朋友識咗成20年,冇咁易不和嘅。」在陳子聰出院後,師兄都有探過對方,還大爆對方食漢堡包食得很滋味,現時復元中,精神與健康都很好,師兄更直言要養肥陳子聰!