娛樂

2017年8月21日

2017/06/19 (週一) 12:00上午

【明抽暗寸】 阮民安 同囝囝爭人奶飲?

組合E-kids三個成員近日都有喜,噚日父親節,啱啱做老竇嘅阮民安(Tommy)就孖住林詠倫(Alan)同郁禮賢(Tim)出席器官捐贈計劃啟動禮,佢哋用自嘲嚟宣揚器官捐贈,Tim話:「啲人成日問點解E-kids仲未死,既然未死我哋就做番啲有意義嘅事啦,如果死咗就更有意義喇!」Tommy好老實講話自己以前做得衰嘢多,平日呢個鐘數仲瞓緊覺,但今次晨早流流出活動係為咗幫囝囝阮治童積福,至弊畀Tim爆料話佢原來尿片都未換過,淨係識同B仔爭人奶飲,仲大讚好味,真係抵死!其實Tim嘅太太7月就生得,佢慶幸公司好諒解,畀佢同Tommy接Job度期都以仔為先,不過啱啱訂婚嘅Alan就因為咁,唔知幾時至搞到婚禮喇,佢講笑指:「死啦!又要等阿Tim生B,MV又未拍,跳舞學校又啱啱起步,不如3個一齊擺酒,再整個演唱會Cap水啦!」嘩,食咗誠實豆沙包呀你?