娛樂

2019年6月25日

2019/04/15 (週一) 12:00上午

《無雙》成大贏家 黃秋生3度封影帝

《第38屆香港電影金像獎》的得獎名單昨晚終於揭盅,電影《無雙》榮獲7個獎項,成為大贏家;而爭崩頭的影帝、影后,最終分別由《淪落人》黃秋生和《三夫》曾美慧孜大熱奪得!

影壇年度盛事《第38屆香港電影金像獎》頒獎典禮,昨晚假尖沙咀文化中心圓滿結束,所有得獎項目經已塵埃落定,當中莊文強執導的電影《無雙》橫掃7個獎,包括最佳電影、最佳導演、最佳編劇和最佳剪接等,成為大贏家!
今屆大會起用32名新演員擔任司儀,眾人以擊鼓表演展開序幕,緊接播出短片悼念離世的圈中人,包括藍潔瑛、盧凱彤、林嶺東及鄒文懷等。昨晚率先頒發最佳新演員,憑《逆流大叔》入圍的視后胡定欣最終失落獎項,由《淪落人》Crisel Consunji贏得,該片導演陳小娟亦勇奪新晉導演獎。
而惠英紅憑《翠絲》第二度榮膺最佳女配角,她感激眾台前幕後之餘,又多謝自己並解釋:「其實呢幾年拍多咗戲,我可以話係最支持新導演嘅演員,因為我抵得諗,我覺得香港要百花齊放,一定要有後生嘅繼續落去,我哋老人家賺多賺少冇所謂,希望做番好似我初出道咁,年產400幾部戲,各色各樣,咁我就好開心、好榮幸。」最佳男配角則由《翠絲》袁富華奪得,他又向台下落敗的廖啟智及潘燦良鞠躬,答謝兩人於影壇默默耕耘去做好電影藝術。
曾美慧孜大熱奪影后
影帝、影后方面,早前憑《三夫》率先於香港電影評論學會大獎及香港電影導演會年度大獎奪影后的內地女星曾美慧孜,結果再下一城榮膺最佳女主角,成功擊敗同樣呼聲甚高的《非分熟女》蔡卓妍,她說:「多謝香港電影畀一雙玻璃鞋我,多謝陳果畀一張船飛我,令我拍咗人生第一部做女主角嘅電影。」至於《淪落人》黃秋生最終大熱贏得影帝寶座,他笑謂:「多謝投票畀我嘅人,令我知道自己演戲仲可以,多謝冇投票畀我嘅人,令我知道自己仍有不足,亦多謝老闆楊受成令我可以唔收錢演呢套戲,如果你想攞獎,不妨試吓好心有好報。」
此外,終身成就獎得主謝賢發表感言時,自嘲年紀大就退休,又不忘搞鬼力Sell自己:「你哋有乜想搵我,隨便,我希望將來再拍多啲好戲畀你哋睇。」

;