唐牛(狂牛)

2018年9月24日

豪門股宴 唐牛(狂牛)

2017/02/22 (週三)

超筍機會在眼前

同一隻股票,不同時候買入,可以有不同的結果。如果你在2015年大時代以300蚊掃入港交所(388),今時今日帳面輸三成。相反,如果舊年初市況最低迷時撈貨,至今則有逾兩成水位。
「鬼唔知低位撈貨贏梗咩!」是的,冇人知道股票幾時係最平,幾時係最貴,用技術分析術語講,超買完可以再超買,超賣完亦可以更超賣。大家能夠做嘅有兩點,第一,勿被市場氣氛牽着走,人買你又買,以為遲咗買會執輸?落盤那一刻其實已經輸咗;第二,用數字說服自己,簡單嚟講,就係計值博率,呢一刻入場贏面有幾高,呢啲嚟講嘅炒股班都會教,大家千祈唔好錯過。
賣完廣告,點可以冇推介,今日講嘅中國飛機租賃(1848),正正用數字說故事。公司日前公布盈喜,預計全年盈利將增長不少於60%,以2015年賺3.8億銀計,即2016年盈利達6.1億銀;又2016年中期賺2.4億銀,即下半年賺3.7億銀,按半年計盈利亦升五成,爆燈指數五粒星。
還有兩點要注意:第一,中國飛機租賃大時代曾逼近15元,當時年賺3億銀,而家盈利多一倍,股價竟平三成幾四成,市盈率只得10倍。第二,李嘉誠旗下長實地產(1113)明言轉型,飛機租賃料成為新寵,連超人都睇中,呢個肯定係朝陽行業,一個超抵博嘅機會就在眼前,把握機會捉緊它吧!

唐牛
(逢周三、 五見報)

唐牛(狂牛)