徐燦傑

2019年1月18日

魔鬼教室 徐燦傑

2018/03/09 (週五)

理工DBA的前與進

識我嘅朋友都知道,我喜歡終身學習(Life long learning),有時係因為工作需要,有時係因為市場環境改變,令你以前賴以為生嘅能力需要同市場結合,透過吸收新嘅核心能力(Core competencies),令自己嘅競爭優勢(Competitive advantage)進一步提升!所謂活到老、學到老,呢句說話永遠都係管用!
上星期多謝理工大學工商管理博士課程(DBA)邀請,出席一個金融科技(Fin-tech)講座!呢個講座為佢哋嘅同學提供一個市場上最新、最前衛嘅資訊分享!畢竟市場在變,好多嘢淨係讀書係睇唔到嘅!讀書固然係吸收知識,但最緊要係透過分享喺唔同行業崗位上嘅寶貴經驗,創造更大效益。咁樣,先至係讀書同時,仲需要面對面(Face to face)嘅主因!
當日有兩位講者,其中一位以國有銀行主管級人員身份,分享金融科技對佢嘅影響,令我體會到國有銀行與時並進嘅心態,並唔係大家想象中咁慢同埋咁差!只不過有時我哋所知有限,未能了解好多行業中嘅持份者,點樣透過金融科技蛻變求生!另一位講者就分享咗喺美國科網公司上市嘅原因,同埋成功嘅要素!當然,嚟緊香港推行「同股不同權」,加上國內都準備推行CDR,令唔少海外科網公司希望踏足港股呢個「平台」,去更上一層樓啦!
理工大學作為香港第一間舉辦工商管理博士課程嘅院校,經歷咗好多唔同年代嘅洗禮,亦跟隨時代進步。佢哋嘅課程亦可以話係與時並進,加上嘅除咗重視師資之外,亦透過成立好多唔同嘅科研中心同顧問服務公司,去提升整個課程理論與實務嘅連接點!好多大學都希望能夠做到,不過我覺得理工大學嘅工商管理博士課程暫時勝人一籌!起碼係見到佢不斷進步!

徐燦傑
(逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

徐燦傑