萬南

2018年12月17日

二五中環 萬南

2017/09/26 (週二)

二五中環

白藥「國際化」 搵萬隆幫手
今年2月份,萬隆控股(030)宣布同雲南白藥清逸堂共同成立一間合營公司,經營個人護理產品,包括女性經期護理用品,同埋雲南白藥目前喺內地經營嘅各類護理用品,例如洗髮水、牙膏等等,力拓商機無限嘅內需市場。
不過,好消息又點止一個?呢間早期做財經報價嘅上市公司,最近仲得到雲南白藥大股東陳發樹加持,透過雲南白藥控股公司入股16.67%,成為主要股東,投資規模接近兩億元,幫佢哋發展個人護理產品業務。
不得不提嘅係,雲南白藥其實唔係淨係識做「金創藥」,目前單單喺深圳上市嘅平台,市值都已經去到900億人仔,據知陳樹發同雲南白藥管理團隊,希望透過萬隆令雲南白藥集團更加國際化,睇嚟白藥、萬隆合作日後將更為繄密,大家不妨金睛火眼睇實。

行行出狀元
「收買佬」申上市
前排因為內地批文問題,回收商拒收紙皮,搞到隨街紙皮影響市容。事實上,好多人依然認為回收行業等同「執垃圾」,但其實行行出狀元,上星期就有一間土炮電子產品回收公司富元控股入紙,申請喺主板上市。
富元業務其實好簡單,回收電腦、手機及智能手錶等產品,檢查各零件性能,策略係救到就救,變成翻新電子產品賣去東南亞國家;救唔到就將電子產品煎皮拆骨,將含有金銀銅等值錢嘅零件熔咗,變成貴金屬出售。唔講或者你唔知,每部智能電話內嘅零件,含有30毫克黃金,山大絕對斬埋有柴,尤其係香港人咁鍾意換電子產品。
再睇富元歷史背景,並唔係老牌回收公司,由陳漢僑(45歲)及張綿華(38歲)於2013年創立,佢哋應該都冇讀過大學(否則唔會唔寫啦),而且係半途出家搞回收,短短幾年已經晉身全港三大回收商。截至今年7月純利2,459萬元,夠資格申請上市,令萬南諗起股壇一句明言「High tech揩嘢,Low tech撈嘢」。

新iPhone一出 電話費反減
以往每逢有新iPhone推出,都係電訊商加月費嘅時機,但今年有被認為最多改革嘅iPhone X(圖)面世,但電訊商竟然不加反減,甚至出現割價搶客轉台潮,情況唔尋常。
萬南問過電訊股分析員點解會咁,佢話電訊商傾唔掂數,其中營運虛擬流動網絡商(MVNO)嘅香港寬頻(1310)為咗搶客,掀起呢場割價戰,其他對手焗上擂台迎戰,否則就要冒客戶人數急插嘅風險。分析員仲話,政府明年好大可能重新拍賣部分頻譜,以引入有效競爭,聞說拍賣其中一個考慮因素,係睇現有客戶數量多少,所以大家都唔敢放軟手腳 。喺咁嘅情況下,利潤肯定唔見一截,分析員認為呢兩年係咪沾手電訊股咁話。

萬南
筆者為資深中環
金融界人士
central25@ymail.com

萬南